Ինչի մասին է վկայում Պուտինի եռօրյա այցը Թուրքիա

Մինչ հայաստանյան հասարակությունը հաշվում է Նիկոլ Փաշինյանի քայլերը եւ քննարկում Էդմոն Մարուքյանի նամակը, իսկ մամուլը տարատեսակ սկանդալներ եւ ինտրիգներ է հորինում, հայաստանյան մամուլի, քաղաքական եւ քաղաքագիտական դաշտի ճնշող մեծամասնության կողմից աննկատ մնաց ՌԴ նախագահ Վլադիմիր Պուտինի այցը հարեւան Թուրքիա: Իսկ Պուտինը Թուրքիա է ժամանել եռօրյա այցով:

Պուտինի այցը Թուրքիա պետք է լինի հայաստանյան քաղաքական ուժերի, քաղաքագետների, լրատվական դաշտի ուշադրության կենտրոնում: ՌԴ նախագահն արդեն իսկ հանդիպել եւ առանձնազրույց է ունեցել իր թուրք գործընկեր Ռեջեփ Թայիփ Էրդողանի հետ: Պուտինը հասցրել է լրագրողներին ասել, որ թեթեւակի անդրադարձել են Սկրիպալի գործին, ինչպես նաեւ պայմանավորվել են արագացնել ռուսաստանյան զենիթահրթիռային С-400 համալիրների մատակարարումը Թուրքիային: Ի դեպ, Պուտինը մասնակցել է նաեւ Թուրքիայի առաջին ատոմակայանի աշխատանքների մեկնարկի առիթով կազմակերպված հանդիսավոր միջոցառմանը: 

Ի դեպ, «Ակքույու» ատոմակայանի կառուցման հարցում Թուրքիային աջակցում է հենց Ռուսաստանը եւ Պուտինը շեշտել է, որ Ռուսաստանում եւ Թուրքիայում նոր աշխատատեղեր կստեղծվեն: Նախատեսվում է շինաշխատանքներն ավարտել 2023-ին: Հիշեցնենք, որ Թուրքիան առիթը բաց չէր թողնում եւ չի թողնում պահանջելու հայաստանյան ատոմակայանի փակումը:

Թուրքական ատոմակայանն ունենալու է չորս էներգաբլոկ, որոնցից յուրաքանչյուրի հզորությունը կազմելու է 1200 ՄՎտ: Պուտինը Թուրքիայում շեշտել է, թե իրենք դնում են թուրքական ատոմային արդյունաբերության հիմքերը:

Ընդգծենք, որ Եվրոպան Թուրքիային երկար ժամանակ հորդորում էր հրաժարվել ատոմակայան կառուցելու մտադրությունից: 

Ինչ վերաբերում է Էրդողան-Պուտին առանձնազրույցին, ապա այն տեւել է մոտ մեկ եւ կես ժամ: Կողմերը քննարկել են երկկողմ հետաքրքրություն ներկայացնող մի շարք հարցեր, որոնց մասին, բնականաբար, մանրամասներ չի հաղորդվում: Դժվար չէ ենթադրել, որ շոշափվել է նաեւ Արցախի խնդիրը, բայց այդ մասին ոչ թուրքական, ոչ էլ ռուսաստանյան աղբյուրները տող անգամ չեն գրում: 

Նույնիսկ ռուսաստանյան որոշ փորձագետներ ոգեւորված չեն ռուս-թուրքական սերտացող փոխահարաբերություններով: Նրանք շեշտում են, որ Արեւմուտքի ճնշումները եւ պատժամիջոցներն են Պուտինին ստիպում եղբայրանալ Անկարայի հետ: Հիմա Մոսկվան արդեն մոռացել է թուրքերի կողմից խփված ռազմական օդանավի եւ սպանված օդաչուի մասին: Հիմա Թուրքիան, որը խնդիրներ ունի Արեւմուտքի եւ Իսրայելի հետ եւ Ռուսաստանը կրկին վերածվում են ռազմավարական դաշնակիցների: Այս փաստին Երեւանում պետք է շատ լուրջ մոտենան: 

Մոսկվայում մոռանում են, որ մի շարք հարցերում Թուրքիան Ռուսաստանի բնական հակառակորդն ու մրցակիցն է եւ եղբայրական հարաբերություններ են կառուցում թուրքերի հետ: Լավ ճանաչելով թուրքերին եւ ծանոթ լինելով թուրքական դիվանագիտությանը, կարելի է վստահաբար պնդել, որ Անկարան իր եղբայրությունը շատ թանկ գնով է վաճառելու Մոսկվային: 

Մեր շուրջը աշխարհը փոխվում է եւ մենք պետք է շատ ուշադիր եւ զգոն լինենք, որ հայ-թուրքական հերթական եղբայրությունը ծանր հետեւանքներ չունենա մեր երկրի եւ մեր ժողովրդի համար: Նույնիսկ ռուսաստանցի փորձագետները վստահ են, որ Թուրքիան Ռուսաստանի նկատմամբ ճնշումներ է գործադրելու Հարավային Կովկասում իր դիրքերն ու ազդեցությունը մեծացնելու համար: 

Դժվար չէ կռահել, որ օգտվելով Ռուսաստանի հետ սերտացող հարաբերություններից Անկարան փորձելու է Արցախի հարցում մեծ զիջումներ կորզել Ռուսաստանից, բնականաբար հօգուտ Ադրբեջանի:

Իսկ այսօր՝ ապրիլի 4-ին Պուտինին եւ Էրդողանին կմիանա Իրանի նախագահ Հասան Ռուհանին եւ կքննարկեն Սիրիայի խնդիրը: Այսօր Սիրիայում են գտնվում եւ թուրքական, եւ իրանյան եւ ռուսաստանյան զինված ուժերը եւ Սիրիայի հարցում նրանք քննարկելու շատ հարցեր ունեն:

Վարդան Մխիթարյան

Top-News.am 

Այս թեմայով Ռուսաստանը պատրաստ է պարզեցնել վիզային ռեժիմը Թուրքիայի քաղաքացիների առանձին խմբերի համար