Հերոսներին հիշում են ամեն օր, եւ ոչ թե տարվա մեջ մեկ օր

Հերոսներին պետք է հիշել, հերոսներին պետք է մեծարել, հերոսների մասին պետք է պատմել դպրոցականներին, բայց ոչ թե տարվա մեջ մեկ կամ երկու օր, այն էլ ողբերգական տոնայնությամբ, այլ ամեն օր:

Հերոսներին պետք է մեծարել, նահատակ հերոսներին պետք է հարգել, մեծարել մեր ամենօրյա աշխատանքով, ամենօրյա քաղաքացիական կեցվածքով, մեր ամենօրյա քայլերով ու դիրքորոշմամբ:

Հերոսների մասին գրելով, նրանց ընտանիքների մասին ահասարսուռ կամ սահմռկեցուցիչ ռեպորտաժներով, մեղավորներին գնդակահարելու պահանջով հերոս չեն հարգում:

Ուզո՞ւմ եք իսկապես հարգել մեր հերոսների հիշատակը՝ ձեզ պահեք իսկական մարդու նման, հարգեք միմյանց, մի նեղացրեք, մի վիրավորեք, ձեր համեստ եւ ոչ համեստ միջոցներով օգնեք բանակին, որ այն ավելի լավը դառնա, ձեր աշխատած ոլորտում այնպիսի քայլեր արեք, որ վերանա մեզ շրջապատող կեղտոտ եւ բոլորին խանգարող լարվածությունը, որ մարդկանց միջից դուրս գա պանդխտության վիրուսը, որ ՀՀ քաղաքացին չմտածի արտագաղթելու մասին:

Ուզո՞ւմ եք հարգել հերսներին, ապա նրանց հիշեք ամեն օր: Հիշելիս պարտադիր չէ բարձրաձայն արտահայտվել կամ երեսներիդ մուր քսեք ու հուզված ճառեր ասեք: Հիշում են կոնկրետ քայլերով, որոշումներով եւ գործողություններով:

Մեր հերսներն իրենց կյանքը, առողջությունը նվիրեցին հայրենիքին, մեր սահմանների պաշտպանությանը, իսկ դուք ձեր ամեն քայլից առաջ մտածեք՝ իսկ դուք ինչ եք անում մեր հայրենիքի մասին: Մի մտածեք, թե այլոք, այլ պաշտոնյաները, այլ գործարարներն, այլ տաքսիստները կամ շինարարները, ուսուցիչներն ու բժիշկներն ինչ են անում, այլ մտածեք, թե դուք ինչ արեցիք, որ մարդիկ աշխատանքի գնան ժպտալով, տուն վերադառնան բարձր գլխով եւ տրամադրությունը տեղը, եւ այսպես շարունակ:

Չի կարելի ատել Հայաստանը, երազել Ամերիկայում եւ Ռուսաստանում, Հունաստանում եւ Ճապոնիայում մշտապես բնակվելու մասին, եւ հարգել հերոսներին: 

Top-News.am