Պուտինի մերձավոր շրջապատը փորձել է նրան համոզել հրաժարվել ինտերնետի արգելափակումից. The Guardian

ՌԴ նախագահ Վլադիմիր Պուտինի մերձավոր շրջապատի պաշտոնյաները փորձել են նրան համոզել հրաժարվել Ռուսաստանում ինտերնետի խիստ սահմանափակումներ մտցնելուց, որոնք ուժեղանում են 2025 թվականից, հաղորդել է բրիտանական The Guardian թերթը։ Անանուն աղբյուրների համաձայն՝ այդ պաշտոնյաների թվում էին Պուտինի մամուլի քարտուղար Դմիտրի Պեսկովը և նախագահի աշխատակազմի ղեկավարի առաջին տեղակալ Սերգեյ Կիրիենկոն: Ըստ պարբերականի՝ ինտերնետի անջատումները, որոնք հանգեցնում են ռուսական բիզնեսի բազմամիլիարդանոց կորուստների, դարձել են Ռուսաստանի վերնախավի քննարկման թեման։

Փորձերը՝ համոզելու Պուտինին չխստացնել թվային սահմանափալումները, դրական արդյունք չեն տվել, քանի որ Ուկրաինայի դեմ պատերազմի ժամանակ նա ապավինում է ուժայինների կարծիքին, գրում է բրիտանական թերթը: Ավելի վաղ The Bell պարբերականը հայտնել էր, որ ՌԴ-ում ինտերնետի ոլորտում սահմանափակումների ալիքը հովանավորել է ԱԴԾ երկրորդ ծառայությունը, որին Կրեմլը քարտ-բլանշ է տվել այդ ոլորտում։

Ըստ The Guardian-ի աղբյուրի՝ Ռուսաստանի հանրային դժգոհության պատճառ են նաև 2026 թվականին հարկերի բարձրացումն ու գների աճը, նաև Սիբիրում անասունների զանգվածային սպանդը։

Ապրիլին Պուտինի նկատմամբ հանրային դժգոհությունը նկատվել է նույնիսկ պետական ​​​​վերահսկողության տակ գտնվող կազմակերպությունների անցկացրած հանրային հարցումներում: Այդ ժամանակ Ռուսաստանի բնակչության ընդհանուր երջանկության ինդեքսը իջել էր մինչև 15 տարվա ամենացածր մակարդակի, իսկ ՌԴ նախագահի նկատմամբ քաղաքացիների վստահության վարկանիշն ամենացածրն էր պատերազմի սկզբից ի վեր: