Իրանը «ենթարկվում է կործանման», բայց հեղափոխությունը պահանջում է «ցամաքային բաղադրիչ». Նեթանյահու

Նա նշել է, որ իրանցի ժողովուրդը ի վերջո պետք է «հասնի այդ պահին»։ «Մենք կարող ենք պայմաններ ստեղծել, բայց, գիտեք, իրենք պետք է օգտվեն այդ պայմաններից որոշակի պահի»,- ասել է նա։ Հեղափոխությունը չի կարող տեղի ունենալ «միայն օդից», շարունակել է նա։ «Օդից կարելի է շատ բան անել, եւ մենք դա անում ենք, բայց... պետք է լինի նաեւ ցամաքային բաղադրիչ»։ Նրա խոսքերը բաց հնարավորություն են թողել, որ նման գործողությունները ցամաքում կարող են ստանալ ամենատարբեր ձեւեր։ «Գոյություն ունեն այդ ցամաքային բաղադրիչի բազմաթիվ տարբերակներ, եւ ես ինձ թույլ կտամ ձեզ չներկայացնել այդ բոլոր հնարավորությունները»։

Այս մեկնաբանությունները հնչել են այն բանից մի քանի ժամ անց, երբ նախագահ Դոնալդ Թրամփը, ելույթ ունենալով Օվալաձեւ աշխատասենյակում, հայտնել էր, որ ամերիկյան զորքեր չի ուղարկի Մերձավոր Արեւելք։

Նեթանյահուն նաեւ քանիցս մերժել է այն մեղադրանքները, որ Իսրայելն է փաստացի ԱՄՆ-ին ներքաշել պատերազմի մեջ։ Նրա խոսքով՝ Թրամփին համոզել պետք չէր Իրանի միջուկային սպառնալիքի հարցում, «նա է դա բացատրել ինձ, ոչ թե ես՝ նրան», նշել է վարչապետը։