Ի՞նչ անել, որն է ելքը

Վստահաբար կարող ենք ասել, որ 2026-ի գլխավոր իրադարձությունը լինելու է ոչ Խաղաղության պայմանագրի ստորագրումը, ոչ անգամ խորհրդարանական ընտրությւոնները։ Գլխավոր իրադարձությունը պտտվում է մեր եկեղեցու, իսկ ավելի կոնկրետ՝ կաթողիկոսի շուրջ։

Մի իրավիճակը է, որը անպայման հանգուցալուծում է պահանջում։ Մի իրավիճակ է, որը չի կարող լուծում չունենալ։ Ընդ որում, հանուն պետության, եւ առաջին հերթին հանուն Հայ Առաքելական Եկեղեցու, այդ լուծումը պետք է լինի գերճշգրիտ եւ հնարավորին չափ շուտ։ 

Շախմատային լեզվով ասած՝ մի դիրք է, որտեղ պետք է անենք միակ ճշգրիտ քայլերը, ընդ որում՝ արագ։

Ի՞նչ անել, որն է ելքը։

1. Եկեղեցու շուրջ ստեղծված իրավիճակը քաղաքական ուժերը չպետք է փորձեն օգտագործել հանուն իրենց քաղաքական եւ կուսակցական շահերի։

Այն իրավիճակը որ ստեղծվել է հիմա, մեղմ ասած, հարիր չէ քաղաքակիրք ժողովուրդներին։ Նիկոլ Փաշինյանի աջակիցները կիրակնօրյա պատարագների են մասնակցում բացառապես նրա համար, որ այնտեղ է իրենց քաղաքական առաջնորդը։ Մյուս կողմից Գարեգին Բ-ին աջակցում են Նիկոլ Փաշինյանին ընդդիմադիր ուժերը, անկախ իրենց կրոնական կողմնորոշումից։ Անհեթեթության գագաթնակետն այնտեղ է ,որ այսօր Գարեգին Բ-ին աջակցում են մարդիկ, որոնք նրա ամենասուր քննադատներն են եղել, եւ նրանք, ովքեր եկեղեցուն քննադատում, անգամ ծաղրում էին, որ հրաժարվում է եկեղեցական ծեսով ամուսնացնել սեռական փոքրամասնություններին։

2. Գարեգին Բ-ի հրաժարականը անխուսափելի է սկսած 1999թ. հոկտեմբերի 27-ից։ Արյունալի ոճրագործության օրը կաթողիկոս ընտրելը, մեղմ ասած, լավ խորհրդանիշ չէր եւ ծանր դրոշմ է։

Սա քննարկման անգամ չպետք է ենթարկել։ Ավելին, անգամ նոր ընտրությանը կարող է մասնակցել հենց Գարեգին Բ-ն, եթե իհարկե հերքվեն այն պնդումները, թե նա փաստացի ամուսնացած է եղել եւ երեխա ունի։

3. ՀՀ վարչապետ Նիկոլ Փաշինյանը պետք է ետ քաշվի եկեղեցու շուրջ տեղի ունեցող իրադարձություններից եւ մասնակից լինի որպես պետության ներկայացուցիչ միայն կանոնադրության մշակման եւ ընդունման գործընթացին։

4. Եկեղեցու արքեպիսկոպոսները, եպիսկոպոսները ամուսնացյալ եւ ոչ ամուսնացյալ քահանաները պետք է ամենաակտիվ մասնակցությունն ունենան եկեղեցու կանոնադրության մշակմանը եւ կաթողիկոսի ընտրությանը, իհարկե, աշխարհիկ հեղինակավոր հավատացյալների մասնակցությամբ։

Սա է միակ ճանապարհը։ Մնացած բոլոր ճանապարհներն անդադար հարվածելու են մեր պետությանը, Հայ Առաքելական Եկեղեցուն եւ ազգին։

Top-News.am