Հայտնի է՝ երբ կավարտվի Գյումրի - Երևան ճանապարհի շինարարությունը

Գյումրի - Երևան ճանապարհին, որտեղ շինարարություն է, և որի պատճառով վարորդները մի քանի կիլոմետր մեքենաները վարում են հանդիպակաց՝ Գյումրի- Երևան հատվածով, Auroranews.am-ը փորձեց Ճանապարհային դեպարտամենտից ճշտել, թե երբ է մոտենում այդ հատվածի շինարարության ավարտը։

« Մ-1 միջպետական ճանապարհի Ձեր նշած հատվածում շինարարությունը դեռ չի ավարտվել, այս պահին ընթանում են անվտանգության տարրերի տեղադրման աշխատանքներ, ինչը խիստ կարևոր է երթևեկության անվտանգության ապահովման համար։ Հետադարձ ճանապարհը կբացվի շինաշխատանքների ամբողջական ավարտից հետո։ Ավարտը նախատեսված է մինչև 2025 թվականի վերջ։

Տ-6-18, /Տ-6-44/ - Երևանի սահման տեղական նշանակության ավտոճանապարհի կմ0+000-կմ 1+100 հատվածի (Կորեայի ձոր) հիմնանորոգման աշխատանքների ավարտը, ըստ պայմանագրի, նախատեսված է 2026 թվականի հունվարի 6-ին։

Իսկ Գետարգել-Առինջ մոլ հատվածում լուսացույցի տեղադրման համար ՀՀ ՏԿԵՆ-ը հայտարարել է մրցույթ, որը կայացել է։ Նախկինում տեխնիկական հսկողության մրցույթը մի քանի անգամ չի կայացել, այժմ նախաձեռնվել է տեխհսկողության աշխատանքների մեկ անձից գնման գործընթաց։ Արվում է ամեն ինչ՝ հնարավորինս սեղմ ժամկետներում լուսացույցերի տեղադրումն իրականացնելու համար»,- հայտնել են գերատեսչությունից։