ՌԴ-ում հետաքննություն են նախաձեռնել Ադրբեջանից ներկրվող քիմիական արտադրանքի նկատմամբ

Գործերը նախաձեռնել են ՌԴ խոշորագույն նավթաքիմիական «Սիբուր» ընկերությունը և նրա կառույցները՝ «Կազանօրգսինթեզն» ու «Նիժնեկամսկնեֆտեխիմը»։

Ադրբեջանից ներկրվող պոլիէթիլենի դեմփինգային մարժան կազմել է 19,9%, պոլիպրոպիլենի համար՝ 33,85%, Թուրքմենստանից ներկրվող պոլիպրոպիլենի և դրա համապոլիմերների համար՝ 13,55%։ Նման մատակարարումները, ասվում է փաստաթղթում, կորուստներ են պատճառում ռուսաստանյան նավթաքիմիական ոլորտին։

Հետաքննության սկզբից 60 օրվա ընթացքում ԵԱՏՀ-ն մեկնաբանություններ և տեղեկություններ կընդունի շահագրգիռ անձանցից։ 45 օրվա ընթացքում նրանք կարող են միջնորդել հանրային լսումներ անցկացնելու համար։ Հետաքննության արդյունքը կարող է լինել տուրքերի, քվոտաների սահմանումը կամ նույնիսկ մատակարարումների լիակատար արգելքը։

Անցյալ տարի պլաստմասսա վերամշակողները կառավարությանը դիմել էին հակադիր խնդրանքով՝ հեշտացնել հումքի ներմուծումը և չեղարկել 2022 թվականից ի վեր Ուզբեկստանից ներկրվող պոլիէթիլենի նկատմամբ գործող 20% ներմուծման հակադեմփինգային տուրքը, ինչպես նաև զրոյացնել բոլոր պոլիմերային հումքի ներմուծման տուրքերը՝ ներկայիս 6,5%-ից։ Այն ժամանակ խոսքը հիմնականում հատուկ տեսակների մասին էր, որոնք չեն արտադրվում Ռուսաստանում։ Սակայն Ադրբեջանից և Թուրքմենստանից մատակարարվում են նաև այնպիսի ապրանքներ, որոնք կան նաև ռուսաստանյան ընկերությունների տեսականիում։ Դրանցում աղբյուրները հաստատել են, որ ներմուծվող հումքը շատ դեպքերում մատակարարվում է ռուսաստանյանից ցածր գներով։

NEFT Research-ի կառավարիչ գործընկեր Սերգեյ Ֆրոլովը նույնպես ասում է, որ Ռուսաստանն արտադրում է պոլիէթիլենի ողջ տեսականին, որը թողարկվում է Ադրբեջանում։ Ինչպես նշում է փորձագետը, արտադրանքի դեմփինգային գներով մատակարարումները ՌԴ հիմնականում տեղի են ունեցել սահմանամերձ շրջաններում։ Նա կարծում է, որ նույնիսկ ներմուծման լիակատար փակումը լուրջ ազդեցություն չի ունենա ռուսաստանյան շուկայի վրա, քանի որ «Սիբուրը» ցածր եկամտաբեր ասիական սփոթային մատակարարումների մի մասը կվերաուղղի ներքին շուկա։ Իսկ Ադրբեջանի համար, հավելում է փորձագետը, ՌԴ պրեմիում շուկայի կորուստը շատ մեծ խնդիր կդառնա։

Միևնույն ժամանակ, «Գրանդ-մաստեր» թաղանթ արտադրող ընկերության սեփականատեր Անզոր Ուզդենովը մտավախություն ունի, որ Ադրբեջանից ավելի էժան հումքն այլ շուկաներ վերաուղղելուց հետո այնտեղից Ռուսաստան մուտք կգործի պատրաստի արտադրանք, որի հետ ստիպված կլինեն մրցակցել տեղական վերամշակողները։