ՀՀԿ ցուցակի գաղտնի ուղերձը

Դեռ ամիսներ առաջ էին երկրում լուրեր պտտվում, թե Սերժ Սարգսյանը ցանկանում է անձամբ գլխավորել ՀՀԿ նախընտրական շտաբը: Շատերը լսում էին եւ ասում՝ ոչ, չի կարող պատահել, երկրի նախագահը չի կարող ինչ որ կուսակցության շտաբի պետ լինել: Ստացվեց, որ կարող է: ՀՀԿ շտաբը գլխավորելու է Սերժ Սարգսյանը:

Իսկ ՀՀԿ նախընտրական ցուցակը գլխավորում է պաշտպանության նախարար Վիգեն Սարգսյանը: Հաշվարկը պարզ է՝ ինչպես կարելի է այս բարդ ժամանակներում չաջակցել հայոց բանակին: «Քվեարկում եք Վիգեն Սարգսյանի գլխավորած ցուցակին՝ քվեարկում եք բանակի օգտին»,- կասեն ՀՀԿ քարոզիչները: Ոմանք էլ խեղճ ու կրակ ժողովրդի վրա պարզապես ճնշում կգործադրեն՝ ինչպե՞ս, դուք բանակի՞ դեմ եք գնում: 

Սա մեր դաժան եւ տխուր իրականությունն է: Մեզ շարունակում են մեծ արագությամբ տեղավորել անդունդի ամենախորքում: Իհարկե, մեզ կասեն, թե յուրաքանչյուր կուսակցության իրավունքն է, թե ով է գլխավորում ցուցակը, բայց իրականությունը եւ հայաստանյան իրողությունները բոլորովին այլ են:

Ցուցակի երկրորդ համարն էլ Տարոն Մարգարյանն է: Այստեղ եւս Սերժ Սարգսյանի հաշվարկը շատ պարզ է, եւ ինչպես ասում են՝ մեկնաբանություններն ավելորդ են: Երրորդ տեղում արդարադատության նախարար Արփինե Հովհաննիսյանն է:

Ակնհայտ է, որ ՀՀԿ-ի անհաջողության եւ հաջողության դեպքում վերոհիշյալ երեք հոգին պատգամավոր չեն դառնալու: Եռյակը կազմված է ինչ-ինչ խնդիրներ լուծելու եւ մարդկանց աչքին փոշի փչելու համար: Հիմա հերթը ընտրողինն է, որը պետք է կայացնի իր որոշումը:

Իհարկե, եթե Հայաստանը լիներ զարգացման այլ մակարդակում, եւ չլինեին մարդիկ, որոնք անհամբեր սպասեին ընտրություններին՝ փող բռնելու համար, ապա որեւէ ցուցակ, որեւէ դասավորություն բոլոր ոլորտներում ձախողված ՀՀԿ-ին չէր կարող օգնել: Ցավոք,Հայաստանը բոլորովին այլ մակարդակի վրա է, որտեղ պետականության գիտակցումը, պետական մտածողությունն էկզոտիկ երեւույթներ են, եւ որտեղ քվեարկելու համար փող բաժանելն ու փող վերցնելը սովորական են դարձել:

Ի դեպ, պատգամավոր դառնալու ցանկություն հաստատ չունեն, բայց ցուցակում են նաեւ Արա Բաբլոյանը եւ մշակույթի նախարար Արմեն Ամիրյանը: Կրկնենք՝ հաշվարկը պարզ է:

Շատ հետաքրքիր է երկրորդ հնգյակը: Արմեն Աշոտյանը, Էդուարդ Շարմազանովը, Մարգարիտ Եսայանը, Սամվել Ֆարմանյանն ու Կարեն Ավագյանը: 

Այս անուններն արդեն բավական են, որ ՀՀ քաղաքացին որեւէ դեպքում չքվեարկի ՀՀԿ-ի օգտին: Երկրորդ հնգյակում ընդգրկված են մարդիկ, որոնք անցած հինգ տարիների ընթացքում ամենաշատն են քծնել Սերժ Սարգսյանին եւ իրենց վրա վերցրել այս կամ այն գործչին վիրավորելու գործառույթը: Ստացվում է, որ ՀՀԿ-ում գնահատվում է քծնանքը եւ ՀՀԿ-ի ցուցակն էլ եւս մի կոչ է ՀՀԿ-ականներին եւ հանրապետականներին՝ քծնեք, կեղտոտ հանձնարարություններ կատարեք, եւ ձեզ համար լավ կլինի:

Սա է մեր իրականությունը: Եւ արդեն իրոք հերթը հանրությանն է, որը պետք է պատասխանի երկու հարցի՝ ցանկանո՞ւմ է շարունակել վատ ապրել եւ ցանկանո՞ւմ է ունենալ զարգացած եւ խաղաղության մեջ գտնվող պետություն:

Գագիկ Մարտիրոսյան  

Այս թեմայով Շարմազանովն այդպես էլ չհասկացավ, թե ինչ էր ասում դեսպանը Դուք փողը տվեք եւ մի կողմ քաշվեք, իսկ մենք ինչ կուզենք, այն էլ կանենք Ինչու ՀՀԿ-ում լարվածություն չկա ՀՀԿ-ի երազած Հայաստանն այսպիսին է (Տեսանյութ) ՀՀԿ-ում սուր պայքար է. նույն պաշտոնին երեք մարդ է հավակնում, այդ թվում Միհրան Պողոսյանը