ԵԱ․ Ռաֆիկ Հարությունյանը պարգեւատրվեց երկու բրոնզե մեդալներով

Բուլղարիայի մայրաքաղաք Սոֆիայում անցկացվող ծանրամարտի Եվրոպայի առաջնությունում տեղի ունեցավ տղամարդկանց 81 կգ քաշային կարգի չեմպիոնի եւ մեդալակիրների պարգեւատրման արարողությունը: Այս քաշային կարգում Հայաստանի ներկայացուցիչ Ռաֆիկ Հարությանը պարգեւատրվեց երկամարտի բրոնզե եւ հրում վարժության փոքր բրոնզե մեդալներով:

Հայաստանի ներկայացուցիչ Ռաֆիկ Հարությունյանը երկամարտի 336 կգ արդյունքով բրոնզե մեդալ նվաճեց: Նա պոկում վարժությունում գրանցել էր 154 կգ, հրումում՝ 182 կգ:

81 կգ քաշային կարգի Եվրոպայի չեմպիոնի տիտղոսը նվաճեց իտալացի Օսկար Մարտինես Ռեյեսը: Երկամարտում նա գրանցեց 346 կգ (155+191): Արծաթե մեդալակիր դարձավ B խմբի հաղթող, ալբանացի Կրիստի Ռամադանին: Երկամարտում նա գրանցել էր 341 կգ արդյունք (151+190):

Անցած տարի Երեւանում անցկացված Եվրոպայի առաջնությունում Ռաֆիկ Հարությունյանը երկամարտի 337 կգ արդյունքով նվաճել էր բրոնզե մեդալ (150+187): 2022 թվականին 354 կգ արդյունքով հռչակվել էր Եվրոպայի չեմպիոն (160+194):

Ռաֆիկ Հարությունյանը Մ23 Եվրոպայի կրկնակի չեմպիոն է, երիտասարդների աշխարհի բրոնզե մեդալակիր:

Տղամարդկանց հավաքականի կազմում կմասնակցեն նաեւ Անդրանիկ Կարապետյանը (89 կգ), Դավիթ Հովհաննիսյանը (96 կգ), Հակոբ Մկրտչյան (96 կգ), Գարիկ Կարապետյանը (102 կգ), Սամվել Գասպարյան (102 կգ), Պետրոս Պետրոսյան (109 կգ), Վարազդատ Լալայան (+109 կգ), Սիմոն Մարտիրոսյան (+109 կգ): Պահեստայիններ՝ Գառնիկ Չալոյանը (61 կգ) եւ Արա Աղանյանը (96 կգ):

Կանանց հավաքականում մրցահարթակ դուրս կգան Տաթեւ Հակոբյանը (81 կգ), Լիանա Գյուրջյանը (81 կգ) եւ Հռիփսիմե Խուրշուդյանը (87 կգ):