Մահացել է լեգենդար Ֆրանց Բեկենբաուերը

78 տարեկանում մահացել է Գերմանիայի հավաքականի եւ Մյունխենի «Բավարիայի» լեգենդար ֆուտբոլիստ, մարզիչ, մյունխենյան ակումբի նախկին նախագահ Ֆրանց Բեկենբաուերը, հաղորդում է sport.sky.de-ն։

Գերմանիայի հավաքականի կազմում Բեկենբաուերը դարձել է աշխարհի չեմպիոն (1974), փոխչեմպիոն (1966), բրոնզե մեդալակիր (1970), Եվրոպայի չեմպիոն (1972) եւ փոխչեմպիոն (1976)։

Գերմանիայի հավաքականում Բեկենբաուերը մասնակցել է 103 հանդիպման, խփել 14 գոլ։ Նա համարվում է լավագույն պաշտպաններից մեկը պատմության մեջ։

1964-1977 թվականներին «Բավարիայի» հետ Բեկենբաուերը դարձել է Գերմանիայի քառակի չեմպիոն, քառակի գավաթակիր, Եվրոպական չեմպիոնների եռակի գավաթակիր։

1972 եւ 1976 թվականներին նա արժանացել է «Ոսկե գնդակի»։

Մարզչական կարիերայի ընթացքում Բեկենբաուերը գլխավորել է Արեւմտյան Գերմանիայի հավաքականը (1984-1990), ֆրանսիական «Մարսելը» (1990-1991) եւ «Բավարիան» (1994-ին, 1996-ին)։ Գերմանիայի թիմը նրա ղեկավարությամբ դարձել է 1986թ․ աշխարհի փոխչեմպիոն, 1990թ․ աշխարհի չեմպիոն։