ՀՖՖ-ն ստվերային ճնշումներ է գործադրում

Հայաստանի ֆուտբոլի ֆեդերացիայի տարեկան ժողովում՝ դեկտեմբերի 28-ին, կկայանան գործադիր կոմիտեի ընտրությունները։ Նոր կանոնակարգով՝ պետք է ընտրվի 11 անդամ եւ ՀՖՖ նախագահը, 12-ից 3-ն անպայման պետք է լինեն կանայք։ Սա ՈՒԵՖԱ-ի պահանջներից է։ ՀՖՖ գործկոմի անդամներին ընտրում են ընդհանուր ժողովի անդամները, այսինքն՝ ֆուտբոլային ակումբների անդամները։ Արդեն լուրեր կան, որ ՀՖՖ ղեկավարությունը քայլեր է ձեռնարկում, որպեսզի անցանկալի անձինք չընտրվեն, հատկապես՝ «Փյունիկ» ու «Շիրակ» ֆուտբոլային ակումբների թեկնածուները՝ ակումբների գործադիր տնօրեններ Կիմ Առաքելյանն ու Տիգրան Վիրաբյանը, ովքեր որոշակի տարաձայնություններ ունեն իրենց հետ։ Իսկ «Փյունիկ»-ի սեփականատերն օրերս դաժան քննադատության էր ենթարկել ՀՖՖ-ին։

Մենք կապվեցինք «Շիրակի» տնօրեն Տիգրան Վիրաբյանի հետ, ով նաեւ Հանրային հեռուստաընկերությունում է պաշտոն զբաղեցնում։ Նա ասաց, որ նման տեղեկություններ չունի․ «Երբ կարդում եք ՀՖՖ կանոնակարգերը, ՀՀ ֆուտբոլի ֆեդերացիան եւ իր ղեկավարությունն ընտրության արդյունքների վրա որեւէ լիազորություն չունեն, այսինքն՝ եթե նույնիսկ այդ շշուկները համապատասխանում են իրականությանը, ինչին ես հակված չեմ հավատալու, ապա դրանք կմնան շշուկ, որովհետեւ այն մարդկանց անունները, որոնք Դուք տալիս եք, այդ մարդիկ չեն ընտրողները եւ այդ մարդիկ չեն կարող, իրենց թույլ էլ չեն տա՝ որեւէ կերպ ազդել ընտրությունների արդյունքների վրա»։

Խոսքը ոչ թե կանոնադրությամբ սահմանված լիազորությունների մասին է, այլ՝ կուլիսային պայմանավորվածությունների։ Վիրաբյանն արձագանքեց․ «Ես կարծում եմ, որ որեւէ ֆուտբոլային ու սպորտային մարդ իրեն թույլ չի տա այս կարեւոր կառույցի, այս կարեւոր օղակի ընտրության հարցում առաջ բերել իր անձնական, թիմային շահերը եւ առաջնորդվել այդ շահերով, այլ ոչ թե հայկական ֆուտբոլի զարգացմամբ։ Ֆուտբոլային ակումբն ինձ առաջադրել է, եւ, հաշվի առնելով այդ ակումբի պատմությունը, ֆուտբոլային հանրույթը ոչ միայն անձ է ընտրում, այլ նաեւ ընտրում է ֆուտբոլային ակումբի կողմից առաջադրված մարդու, իսկ «Շիրակ» ֆուտբոլային ակումբը, ինքներդ գիտեք, ամենատիտղոսակիր եւ լեգենդար ակումբներից մեկն է մեր երկրում։ Ինձ նման խոսակցություններ չեն հասել, կարծում եմ, դրանք իրականության հետ աղերս չունեն։ Այնուամենայնիվ, փաստերը որ համադրում ես, տեսնում ես, որ չի կարող լինել նման կերպ, որովհետեւ այն անձանց մասին, որոնց Դուք նշեցիք, ելքի վրա ազդելու միտում եւ հնարավորություն, այսպես ասած, չունեն»։

Վերջերս «Փյունիկ» ֆուտբոլային ակումբի սեփականատեր Արթուր Սողոմոնյանը խիստ քննադատությամբ էր հանդես եկել ՀՖՖ ղեկավարության հասցեին, պահանջել ՀՖՖ նախագահ Արմեն Մելիքբեկյանի հրաժարականը։ Սողոմոնյանը նաեւ Մելիքբեկյանին ու ՀՖՖ ղեկավարությանը մեղադրել էր փողերի յուրացման մեջ, որ մարզադաշտեր կառուցելու համար ստացված գումարները ծախսվել են, սակայն կառուցվել են անչափ անորակ դաշտեր։ Վիրաբյանին հարցրինք՝ այս քննադատությունների հետ համաձա՞յն է, դրանց մեջ ճշմարտացի դրվագներ կա՞ն, իր կարծիքով։

««Փյունիկ» ֆուտբոլային ակումբի ղեկավարի կողմից հնչեցված մեղադրանքներն իրենց մեջ, անզեն աչքով նայելիս, արդեն իսկ հանցագործության մասին հաղորդում են պարունակում, եւ չեմ ուզի մեկնաբանել մի հայտարարություն, որն իմ մեկնաբանության կարիքը չունի, այլ այլեւս իրավապահների տիրույթում է, պետք է սպասել հետագա զարգացումներին, թե որն է ճշմարտությունը, որովհետեւ կան նաեւ հակառակ կողմից բերված փաստարկներ, եւ անշնորհակալ գործ է այս իրավիճակում որեւէ կողմի իրավացիությանը գնահատական տալը, որովհետեւ կան խնդիրներ, որոնց մասին պարբերաբար «Շիրակ» ֆուտբոլային ակումբը բարձրաձայնել է, ներկայացրել է։ Ցանկացած օղակում կան խնդիրներ, բայց «Փյունիկ» ֆուտբոլային ակումբի կողմից արված հայտարարությունը սահմաններ է հատել, եւ հարցն արդեն տեղափոխվել է իրավական հարթություն, իսկ քանի դեռ իրավական գնահատական չկա, չեմ կարծում, թե կարիքը կա, որ ես մեկնաբանեմ այդ հայտարարությունները։ Կլինի իրավական գնահատական, կհասկանանք, թե ով է այս իրավիճակում ավելի ճշմարտացի, եւ, բնականաբար, «Շիրակն» իր դիրքորոշումը կհայտնի այս հարցի կապակցությամբ»,- պատասխանեց Վիրաբյանը։

Հրապարակ օրաթերթ