1-6 հաշվով պարտվող երկիրը

Ոչ: 6:1 հաշվով պարտվեց ոչ թե ֆուտբոլի Հայաստանի հավաքականը, այլ Հայաստան երկիրը:

Այո, շատ վատ է, չափազանց վատ է, որ սեփական դաշտում ազգային հավաքականը պարտվում է 6:1 հաշվով, բայց մինչ կոնկրետ Հայաստան-Լեհաստան խաղին անդրադառնալը մի հարցադրում. իսկ որ ոլորտում չէ մեր երկիրը պարտվում 6:1 հաշվով: Պարտվում ենք գրեթե բոլոր ոլորտներում, պարզապես ֆուտբոլում կեղծելու, սուտ թվեր գրելու հնարավորություն չկա:

Պարտվում ենք արդյունաբերության ոլորտում, պարտվում ենք գյուղատնտեսության ոլորտում: Պարտվում ենք մշակույթի եւ գիտության, կրթության եւ շինարարության ոլորտում:

Ազգային հավաքականի տղաները, մեծ հաշվով, մեղավոր չեն պարտությունների շարքի համար: Երկրի մթնոլորտն է այդպիսին: Խաղից առաջ հայ երկրպագուները նստած էին ճլորած, անհավես, իսկ ահա Երեւան ժամանած լեհ ֆուտբոլասերները երգում էին եւ անդադար վանկարկում: Հայաստանը ճահճի մեջ է, իսկ Լեհաստանը զարգացող երկիր:

Այս պարտությունից պետք է հետեւություն անի ոչ միայն ազգային հավաքականը, ֆուտբոլի ֆեդերացիան, այլ ամբողջ երկիրը: Այս պարտությունը մեզ սթափվելու կոչ էր անում: Այսպես չի կարելի շարունակել եւ չի կարելի հիմա կենտրոնանալ ֆուտբոլիստների վրա: Խնդիրն այն է, որ ֆուտբոլում առկա խնդիրները երեւում են, թաքցնել չի լինում, իսկ մյուս ոլորտներինը շատերի համար տեսանելի չեն:

Հավատացեք, եթե մրցումներ կազմակերպեն, որտեղ մասնակցեն Հայաստանի այս կամ այն ոլորտի ներկայացուցիչները, ապա կպարտվենք ոչ թե 6:1, այլ 60:1 հաշվով:

Եւ եթե երկրի մթնոլորտը նորմալ լիներ, ապա հավաքականը կունենար լավ դարպասապահ, հավաքական չէին հրավիրվի Կամո Հովհաննիսյանը եւ Տարոն Ոսկանյանը (տեսնես ով է մարզիչներին ստիպում նրանց անդադար հրավիրել հավաքական), Էդգար Մանուչարյանը եւ Արազ Օզբիլիսը մշտապես կհրավիրվեն եւ կխաղան հավաքականում, Մարկոս Պիզելին կլիներ հավաքականում, նրա կողքին կլիներ նաեւ Յուրա Մովսիսյանը, Ռոբերտ Արզումանյանը:

Եկեք երկրի մթնոլորտը փոխենք: Չե՞ք հոգնել այս գաղջ իրականությունից:

Top-News.am