«Մանչեսթեր Սիթիի», «Ռոմայի» եւ «Ինտերի» նախկին ֆուտբոլիստն ավարտեց կարիերան 36 տարեկանում

Ֆուտբոլի Սերբիայի հավաքականի նախկին ավագ Ալեքսանդր Կոլարովն ավարտեց ֆուտբոլիստի պրոֆեսիոնալ կարիերան 36 տարեկանում, հաղորդում է Goal.com-ը։

«Տխուր է կյանքիս այս փուլին հրաժեշտ տալը, բայց ես երախտապարտ եմ հնարավորությունների համար, որոնց շնորհիվ իրականություն դարձրի երազանքս։

Առաջիկայում կսկսեմ պատրաստվել մարզական տնօրենի եւ սկաուտի աշխատանքի Իտալիայի ֆուտբոլի ֆեդերացիայի ֆուտբոլային կենտրոնում՝ Կովերչանոյում»,- նշել է Կոլարովը։

Սերբիայի հավաքականում 94 հանդիպում անցկացրած Կոլարովը ակումբային կարիերայի ընթացքում հանդես է եկել «Չուկարիչկիում» (2004-2006), ՕՖԿ-ում (2006-2007), «Լացիոյում» (2007-2010), «Մանչեսթեր Սիթիում» (2010-2017), «Ռոմայում» (2017-2020) եւ «Ինտերում» (2020-2022)՝ նվաճելով 11 տիտղոս։