Արկադի Անդրեասյան. Քանի դեռ Հայրապետյանն այնտեղ է, ֆուտբոլն այս վիճակում կլինի

Երեւանի «Արարատի» գլխավոր մարզիչ Արկադի Անդրեասյանը NEWS.am Sport-ի թղթակցի հետ զրույցում մեկնաբանել է երկու տարով որակազրկվելու մասին որոշումը:

Պարոն Անդրիասյան, ՀՖՖ-ի կարգապահական կոմիտեն Ձեզ որակազրկեց երկու տարով: Ինչպիսի՞ն է Ձեր արձագանքը: Ի՞նչ քայլեր եք պատրաստվում ձեռնարկել:

Ես չգիտեմ՝ ինչ որակազրկման մասին է խոսքը: Ի՞նչ որակազրկում… Ես տեղյակ չեմ: Ես մասնակցե՞լ եմ, որ տեղյակ լինեմ: Իրենք հավաքվել են, իրենք ինչ-որ քննարկումներ են իրակացրել, ես որեւէ տեղեկություն չունեմ: Ես ներկա չեմ եղել, չգիտեմ՝ ինչ որոշում է, ինչ որակազրկում է:

Երբ ավելի մանրամասն տեղեկանաք Ձեր որակազրկման մասին, ի՞նչ քայլեր կնախաձեռնեք: Ի՞նչ հիմք ունի Ձեզ որակազրկելը:

Ես չգիտեմ: Չգիտեմ՝ ինչ որոշում են կայացրել…

Որոշում է կայացվել՝ Հայաստանի առաջնության «Արարատ» - «Գանձասար-Կապան» խաղին Ձեր ոչ մարզական պահվածքի համար ծառայողական պարտականությունները կատարելու իրավունքից զրկել 2 տարի ժամկետով՝ մինչեւ 2019թ. սեպտեմբերի 20-ը:

Յա՛, հա՞…Դե թող զրկեն, հետո ինչ… Ես տեղյակ չեմ՝ ինչ եք ասում: Ես այդ մասին ոչինչ չգիտեմ, այս որոշման ժամանակ ներկա չեմ եղել, մեր թիմից որեւէ մեկին չեն կանչել, ներկա չեն եղել, որտեղից պետք է իմանամ:

Ինչ ուզում են, անում են: Զանգ տվեք իրենց, իմացեք՝ էտ ոնց են զրկում, ինչ հիմքեր ունեն որակազրկելու: Առանց մարդուն տեղյակ պահելու ինչպե՞ս են որակազրկում, այն էլ 2 տարով, մի հատ տեղյակ չեն պահում՝ ինչ պատճառով են որակազրկում: Ի՞նչն են հիմք ընդունել, որ որակազրկել են:

«Արարատը» Հայաստանի առաջնությունում 5 խաղ է խաղացել, 16 հատ դեղին քարտ են տվել, պետք է հետաքրքվել իրականում՝ ինչ հիմքով են այդքան դեղին քարտ տվել: Ի՞նչ է նշանակում՝ 5 խաղում 16 դեղին քարտ:

Ամեն դեպքում, ի՞նչ քայլեր կձեռնարկեք:

Ես ոչինչ չգիտեմ, որ ինչ-որ բան ձեռնարկեմ (ծիծաղում է): Միայն գիտեմ, որ 5 խաղ եմ անցկացրել, 16 դեղին քարտ ստացել: Երբ ամեն ինչ ավելի մանրամասն եւ ստույգ իմանամ, իհարկե, մի բան կասեմ: Ես մարզումից եմ վերադարձել եւ տեղյակ չեմ՝ ինչու են հավաքվել, ինչ են քննարկել, մենք չենք մասնակցել, բայց առանց մեզ որոշում են կայացրել, դեռ ինձ էլ որակազրկել: Առանց մեզ դավեր են անում հա՞:

«Գանձասար-Կապանի» հետ խաղացել ենք, պարտվել ենք: Այդպես պետք է եղել, որ պարտվել ենք: Հետո ի՞նչ: Այդ խաղի ընթացքում իմ թիմի ֆուտբոլիստներին 4 հատ դեղին քարտ տվեցին, որից 3-ը մեր ֆուտբոլիստներին տվել են խոսելու համար: 4-ից 3-ը զուտ խոսելու համար:

Խաղի ընթացքում Ձեզ դա՞ է զայրացրել:

Բա իհարկե: Խաղի ընթացքում 4 դեղին քարտ է տալիս, 3-ը միայն խոսելու համար, ինչպես չզայրանաս: Մեր ֆուտբոլիստին հարվածում են, մրցավարը հարվածողին դեղին քարտ չի տալիս, իմ ֆուտբոլիստներին է տալիս՝ խոսելու համար: Ու այդպես, 5 խաղի ընթացքում՝ 16 դեղին քարտ:

Դուք միտումնավորություն տեսնո՞ւմ եք այս ամենում:

Բա իհարկե… Սա միտում է: Վերցնում են այսպես բաներ են անում: Բա որ միտում չի, ուրիշ ինչ է՝ 5 խաղում 16 դեղին քարտը: «Շիրակի» հետ այնտեղ խաղացել ենք, ոչ մի դեղին քարտ չի եղել: Այստեղ որ խաղը խաղում ենք, ամեն խաղին 3 հատ անիմաստ դեղին քարտ են տալիս: Այդպես է. որ մեզ, ֆուտբոլիստներին նյարդային վիճակից հանեն, այսպիսի բաներ են անում:

Մի քանի տարի առաջ ֆեդերացիայի հետ նորից պրոբլեմ եղավ: Զրկել տվեցին ֆուտբոլից: Հետո ի՞նչ… Իրենք հիվանդ մարդիկ են:

Ուզում եք ասել՝ հնո՞ւց եկած դավադրություն է:

Այո…Այո… Քանի դեռ Հայրապետյանն այնտեղ է, մեր ու ձեր ֆուտբոլն այս վիճակում կլինի:

Ինչպե՞ս է շարունակվելու Ձեր աշխատանքը, թիմի հետ աշխատանքը:

Ես թիմի հետ նորմալ շարունակում եմ իմ աշխատանքը: Իրենց որոշումը որ լինի, թող լինի, ի՞նչ անեմ…

Ես խորհուրդ կտամ՝ լրագրողները ուսումնասիրեն, թե այդ ինչեր են անում, որ մեր ֆուտբոլն այս վիճակում է:

Լուսինե Շահբազյան

NEWS.am Sport