Ինչու ոչխարի եւ այծի արտահանման մասին Փաշինյանի տվյալները ստույգ չեն

Գյուղատնտեսության ոլորտում վիճակագրական համակարգը որեւէ ընդհանրություն չունի իրական պատկերի հետ, քանի որ թվերը «նկարում են» մարզպետների հանձնարարականով: Այս մասին NEWS.am-ի հետ զրույցում ասաց Ագրարա-գյուղացիական միության նախագահ Հրաչ Բերբերյանը:

«Ապա մարզպետներն այդ ցուցանիշներով գնում են Տարածքային կառավարման եւ ենթակառուցվածքների նախարարություն, որտեղ «նկարում են» ընդհանուր թվերն ու զեկուցում վարչապետին: Եթե խոսվում է արտահանման աճի մասին, ապա ինչու է այս տարի ոչխարի միսը թանկացել 500 դրամով (գրեթե 20 տոկոս)»,-ասաց նա:

Նրա խոսքով՝ ամեն ինչ կախված է նրանից, թե ով է հրապարակում թվերը՝ Պետեկամուտների կոմիտեն, Վիճակագրական կոմիտեն կամ էլ որեւէ այլ գերատեսչություն:

Փորձագետը հիշեցրեց, որ անցած տարի կառավարությունը տվյալներ է հրապարակել, որ արտահանվել է 20 հազար տոննա ոչխարի միս՝ 1 մլն գլուխ:

«Ընդ որում, նույն իշխանությունները գրեցին, որ Հայաստանում ընդամենը 600 հազար գլուխ ոչխար կա: Դա եւս մեկ անգամ ապացուցում է, որ թվերը պարզապես «նկարում են»: Հավաստի տեղեկություն ստանալու համար տվյալներ պետք է ներկայացնել անմիջապես արտադրողները: Մանր եղջերավոր անասունի արտահանման ռեկորդային թիվ է գրանցվել (250 հազար գլուխ) այն շրջանում, երբ գյուղատնտեսության նախարար էր Գերասիմ Ալավերդյանը (2009-2010թթ.-խմբ.), ինչը լուրջ վնաս է հասցրել ոչխարների մայր կազմին»,-հավելեց Բերբերյանը:

Նրա պնդմամբ՝ Հայաստանում տարեկան կարելի է բուծել գրեթե 1,2 մլն գլուխ ոչխար առանց տնտեսությանը վնաս հասցնելու, սակայն դրա համար պրոֆեսիոնալ մոտեցում է պետք:

«Ոչխարներն այսօր բուծվում են հիմնականում Իրանում եւ արաբական երկրներում: Հայաստանում նույնիսկ գործում է իրանական ընկերություն, որը զբաղվում է անասունների որակի վերահսկողությամբ ու մսի տեղափոխմամբ»,-նշեց նա:

Ինչ վերաբերում է խոշոր եղջերավոր անասունին, Բերբերյանի տվյալներով, 3 տարվա ընթացքում Հայաստանը կորցրել է 160 հազար գլուխ:

«Այս տարի առաջընթաց կա, եւ խոշոր եղջերավոր անասունի քանակն ավելացել է 40-50 հազարով (այժմ կա մոտ 450-500 հազար գլուխ)»,-ընդգծեց նա:

Անդրադառնալով կառավարության աջակցության միջոցների մասին՝ փորձագետը պարզաբանեց, որ դրանից օգտվել է 20 ֆերմերներից 1-ը:

«Անարդյունավետությունը կայանում է նրանում, որ իշխանությունները կրկին որոշել են հարստացնել բանկերին, այդպիսով տուժում է գյուղատնտեսությունը: Սուբսիդիաներ պետք է ստանար անմիջապես արտադրողը»,-եզրափակեց ՀԿ ղեկավարը:

Հիշեցնենք, որ օրերս ՀՀ վարչապետ Նիկոլ Փաշինյանը Ֆեյսբուքի իր էջում հայտնել էր, որ 2020 թվականի հունվար-հուլիս ամիսներին Հայաստանից կենդանի ոչխարի եւ այծի արտահանումը նախորդ տարվա նույն ժամանակահատվածի համեմատ աճել է 256 տոկոսով:

«Արտահանվել է շուրջ 41 հազար գլուխ մանր եղջերավոր կենդանի, ընդհանուր առմամբ շուրջ 3,4 միլիոն դոլարի»,-գրել էր վարչապետը: