Ավ․ Իսահակյանի գրադարանի նորաբաց «Ռուսական կենտրոն»-ում կգործեն ռուսերենի անվճար դասընթացներ

Ռուսերենի անվճար դասընթացներ, ռուս գեղարվեստական եւ մասնագիտական գրականություն, կրթական նյութեր, տեղեկատվական մեծ շտեմարաններ։ Երեւանի քաղաքապետարանի Ավ․ Իսահակյանի անվան կենտրոնական գրադարանի մասնաճյուղում արդեն գործում է նորաբաց «Ռուսական կենտրոն»-ը։ Կրթական կենտրոնը ստեղծվել է Երեւանում «Դոմ Մոսկվի» մոսկովյան մշակութագործարարական կենտրոնի (ՄՄԳԿ) նախաձեռնությամբ՝ Երեւանում Մոսկվայի 873-ամյակի միջոցառումների շրջանակում։

«Կրթությունը՝ զարգացած պետության հիմնական եւ գլխավոր բաղադրիչներից մեկն է։ Ուրախ ենք, որ նորաբաց կենտրոնը կօգնի մեր երիտասարդներին, երեխաներին համալրել գիտելիքները եւ իմանալ ավելին ռուս գրականության ու լեզվի մասին։ Կենտրոնում ներկայացված են կրթական նյութերի մեծ բազմազանություն, որոնց միջոցով քաղաքացիները կարող են ճշգրիտ եւ բաց տեղեկատվություն ստանալ Ռուսաստանի մասին ամենատարբեր ոլորտներում, ինչպես նաեւ բարելավվել ռուսերենի մակարդակը։ Սա եւս մեկ քայլ է ամրապնդելու Մոսկվայի կառավարության եւ Երեւանի քաղաքապետարանի միջեւ գործակցությունը եւ երկու ժողովուրդների միջեւ մշակութային երկխոսությունը», - ասաց Երեւանում «Դոմ Մոսկվի» գլխավոր տնօրեն Վահրամ Կարապետյանը։

Կենտրոնի մուտքի կարմիր ժապավենը կտրեցին ՀՀ-ում ՌԴ դեսպան Սերգեյ Կոպիրկինը եւ Ավետիք Իսահակյանի անվան կենտրոնական գրադարանի տնօրեն Հասմիկ Կարապետյանը։

«Ռուսական կենտրոնը»-ի ընթերցողներն ու այցելուները կարող են ծանոթանալ Ռուսաստանի մասին կրթաճանաչողական եւ տեսալսողական նյութերին, հասանելի է գեղարվեստական եւ մասնագիտական գրականության հարուստ հավաքածու, պաշտոնական հրատարակություններ, տեղեկատուներ, էլեկտրոնային գրքեր եւ ամսագրեր, որոնք տեղադրված են նաեւ օնլայն հարթակում։ Կենտրոնը հագեցած է համապատասխան տեխնիկայով, որը տարբեր ձեւաչափերով հասանելի է դարձնում Ռուսաստանի պատմամշակութային եւ գրական ժառանգությունը լայն շրջանակների համար։

«Ժամանակները փոխվել են եւ գրադարանի դերը` ժամանակակից աշխարհին համահունչ, եւս փոխվել է։ Այն պարզապես գիրք ու գրականություն տրամադրող կառույց չէ։ Մեր քաղաքացիների համար այն դարձել է հանրային հարթակ, ուր հատվում են տարբեր ազգերի մշակույթները։ Հարթակ, որը նպաստում է քաղաքացու կրթամշակութային դաստիարակությանը, գեղագիտական ճաշակի ձեւավորմանը, յուրօրինակ հանդիպումների, հանգստի եւ ժամանցի վայր է։ Ավետիք Իսահակյանի անվան կենտրոնական գրադարանի կառուցվածքում «Ռուսական կենտրոնի» ստեղծման անհրաժեշտությունը պայմանավորված է մեր ընթերցողների բազմաթիվ արձագանքներով, ովքեր հաճախ են պատվիրում ժամանակակից ռուսական գրականություն, ցանկանում մասնակցել ռուսաց լեզվի դասընթացների։ Երեւանում «Դոմ Մոսկվի» կենտրոնի եւ Քաղաքապետարանի մշակութային երկխոսության համագործակցությամբ այս ծրագիրը կյանքի կոչվեց»,- ասաց «Ավ. Իսահակյանի անվան կենտրոնական գրադարան» ՀՈԱԿ-ի տնօրեն, ՀՀ Մշակույթի վաստակավոր գործիչ Հասմիկ Կարապետյանը։

ՀՀ-ում ՌԴ դեսպան Սերգեյ Կոպիրկինի խոսքով, նման կենտրոնների բացումը կարեւոր են նաեւ հայ-ռուսական հարաբերությունների ամրապնդման տեսանկյունից:

«Սա առաջին նմանատիպ կենտրոնն է Հայաստանում։ Մյուս գրադարաններում առայժմ ռուսական կենտրոններ չկան։ Երբեմն կարող է թվալ, թե Հայաստանում Ռուսաստանի մասին բոլորը գիտեն, բայց երկու երկրները պետք է շարունակեն աշխատել, որպեսզի պահպանեն եւ զարգացնեն երկկողմ հարաբերությունները։ Հուսով եմ, որ այս կարեւոր նախաձեռնությունը կշարունակվի, այդ թվում նաեւ երկրի մյուս քաղաքներում եւ մարզերում»,-նշեց ՀՀ-ում ՌԴ դեսպան Սերգեյ Կոպիրկինը։

«Ռուսական կենտրոնում» անց են կացվելու ռուսերենի անվճար դասընթացներ երեխաների համար, պարբերաբար կազմակերպվելու են հանրային դասախոսություններ, սեմինարներ, տարբեր հանդիպումներ, ֆիլմերի ցուցադրություններ, խոսակցական ակումբներ։

Առցանց գրադարանն ունենալու է պարբերաբար լրացվող տեղեկատվական թվային շտեմարաններ, որոնք անվճար են լինելու կենտրոնի բոլոր այցելուների համար։ «Ռուսական կենտրոն»-ի մուտքը ազատ է բոլորի համար։

«Ռուսական կենտրոն»-ը բացվել է Երեւանում «Դոմ Մոսկվի» մոսկովյան մշակութագործարարական կենտրոնի եւ Ավետիք Իսահակյանի անվան կենտրոնական գրադարանի գործակցությամբ՝ Երեւանի Քաղաքապետարանի աջակցությամբ։