Կան փաստեր, որ բժիշկները նույնիսկ Հայաստան ժամանելու դեպքում չեն կարող Գագիկ Խաչատրյանին վիրահատել. փաստաբան

Եվրոպական դատարանը պահանջել է, որ ՊԵԿ նախկին նախագահ Գագիկ Խաչատրյանին համարժեք բուժում ապահովի կառավարությունը, այդ թվում նաեւ քանի որ վիրահատությունը նշված է, որ միայն արտասահմանում է հնարավոր կատարել, Եվրոպական դատարանը նշել է, որ արտասահմանյան բժիշկների ներգրավվածությամբ Հայաստանում կատարվի։ Այս մասին NEWS.am-ի հետ զրույցում ասաց Գգաիկ Խաչատրյանի փաստաբան Երեմ Սարգսյանը:

«Այս պահին նման որոշում է կայացրել, բայց արձանագրել է, որ պետությունը պետք է ապահովի համարժեք բուժումը։ Կան փաստական տվյալներ, որ բժիշկները նույնիսկ Հայաստան ժամանաելու դեպքում չեն կարող վիրահատություն կատարել։ Դրա վերաբերյալ դեռեւս 2019 թվականից փորրձում ենք նրանց հրավիրել, բազմաթիվ դիմում-գրություններով հայտնել են, որ դա հնարավոր չէ, որովհետեւ դրա համար ամբողջ կլինիկայով պետք է գան երկարաժամկետ, որովհետեւ ոչ միայն վիրահատությունը, այլեւ հետվիրահատական փուլն է խիստ էական։ Այս մասով կարծես թե հնարավոր չէ։ Չնայած մենք նորից կփորձենք ամեն ինչ անել, որ Հայաստանում իրականացվի, բայց նաեւ այս մասով պետությունը ունի պարտավորություններ՝ ապահովելու համարժեք բուժում, տեսնենք, թե նրանք ինչ միջոցներ կձեռնարկեն։ Ես կարծում եմ՝ եթե պարզվի, որ Հայաստանում ամեն դեպքում հնարավոր չի օբյեկտիվ պատճառներից ելնելով, նորից այս հարցը կբարձրաձայնենք Եվրոպական դատարանում, նոր կտեսնենք՝ ինչ որոշում կկայացվի։ Համենայն դեպս այս փուլում մենք դեռեւս չենք տեսնում, որ կառավարությունը որեւէ քայլ անի դատարանի որոշումից հետո։ Սպասենք, տեսնենք՝ ինչ արձագանք կլինի։ 15 օրվա մեջ պետք է պատասխանեն Եվրոպական դատարանին, թե ինչ են արել։ Դրանից հետո մեր հաջորդ գործողությունները կորոշենք»,-ասաց փաստաբանը:

Նա հավելեց, որ Գագիկ Խաչատրյանն այս պահին քրեակատարողական հիմնարկում է, առողջական վիճակը լավ չի, որովհետեւ եթե լավ լիներ եւ ամեն ինչ պետությունը իրենից կախված արած լիներ, Եվրոպական դատարանը ստիպված չէր լինի այդ որոշումը կայացնել։

«Խափանման միջոցի հարց չի քննարկվում այս պահին, այլ պատշաճ բուժման ապահովման պարտավորությունը, բայց միաժամանակ բողոք ենք ներկայացրել Եվրոպական դատարան հենց կալանքի դեմ եւ այդ բողոքը եթե այլ դեպքերում տարիներով է քննվում, այս գործով առաջնահերթություն է տրվել, կարճ ժամանակում է քննվելու։ Դատարանը ֆիքսում է իրավունքի խախտումը, որից հետո ներպետական ատյաններն են որոշում՝ խախտումը վերացնել, ինչը հանգեցնում է ազատության»,- նշեց փաստաբանը։

Ավելի վաղ հայտնել էինք, որ հուլիսի 21-ին Մարդու իրավունքների եվրոպական դատարանը (ՄԻԵԴ) հրապարակել է իր որոշումը, որով բավարարել է ՀՀ ֆինանանսների նախկին նախարար Գագիկ Խաչատրյանի դիմումը։