Գրիգորի Գրիգորյան. Մենաշնորհը և կոռուպցիան մեծագույն աղետ են մեր ոլորտում

Օրերս «Արմենիա» բժշկական կենտրոնի գլխավոր տնօրեն, բժշկական գիտությունների դոկտոր, պրոֆեսոր, ակադեմիկոս Գրիգորի Գրիգորյանը հանդիպեց մի խումբ ուսանողների հետ, որի ժամանակ քննարկվեցին մենաշնորհի և կոռուպցիայի դրսևորումները բժշկական ոլորտում: Նա իր խոսքում մասնավորապես նշեց. «Գաղտնիք չէ, որ մենաշնորհը և կոռուպցիան խեղդում են Հայաստանը գրեթե բոլոր ասպեկտներում, ամեն բան վերածվում է առևտրային էժան հարաբերությունների, այդ թվում, ցավոք, նաև բժշկական ոլորտը: Սակայն, սկզբունքորեն պետք է պայքարե այս արատավոր երևույթների դեմ և կտրականապես թույլ չտալ օլիգարխիկ բարքերի թափանցումը և կոռուպցիայի խորացումն ու տարածումը առողջապահություն: Պակաս չարագործություն չեն համակարգի հանդեպ նաև դեմպինգային դրսևորումները: Վստահեցնոմ եմ, որ այսօրվա կորուստը վաղը վերականգնել արդեն չի լինի»:

Գրիգորյանն իր խոսքում անդրադարձավ նաև բժիշկների ներգրավվածությանը այս կամ այն բժշկի բարձր անունն ու հեղինակությւոնը արատավորող գործարքներին և ասաց. «Օր առաջ պետք է ստեղծել այնպիսի վերահսկողական գործիքներ, որտեղ նաև բժիշկները ներգրավված չեն լինի զանազան մեքենայությունների մեջ, չեն մասնակցի դեղագործական կամ դիագնոստիկ ընկերությունների կողմից առաջարկվող սպառողական խաղերին: Չեն արատավորի բժշկի բարձր անունն ու հեղինակությունը, հետևաբար` բարձր կպահեն մեր երկրի առողջապահական համակարգի իմիջը: Պետք է փրկել բժշկի պատիվը և նրան չվերածել կոմերսանտի: Խնդիրը, հավատացեք, ոչ այնքան բժիշկն է, որքան համակարգը, որ բժիշկներին խաղի կանոններ է թելադրել: Համոզված եմ, որ մեր երկրի իրական բժշկական համայնքը չկամությամբ է հայտնվել այս առևտրային խաղի կանոններում: Հարկ է բարձր պահել այն գիտակցումը, որ բժիշկը կոչում է»: