Գրիգորի Գրիգորյան.Կայացած առողջապահական համակարգը պայմանավորված չէ պետության հարստության հետ

Օրերս «Արմենիա» բժշկական կենտրոնի գլխավոր տնօրեն, բժշկական գիտությունների դոկտոր, պրոֆեսոր, ակադեմիկոս Գրիգորի Գրիգորյանը հանդիպեց ոլորտի պատասխանատուների հետ, որի ընթացքում խոսվեց առողջապահական համակարգի կայացման մասին` պետության ֆինանսական ռեսուրսի համատեքստում: Իր ելույթում Գրիգորյանը կատարեց մի դիտարկում` ասելով. «Կատեգորիկ թյուր մոտեցում է, թե միայն հարուստ երկրներն ու պետությունները կարող են ունենալ կայացած առողջապահական համակարգ: Իմ խորին համոզմամբ` սա կեղծ արդարացում է, և այդպիսի մտածողությամբ մարդիկ իրավունք չունեն զբաղվելու ոլորտի զարգացմամբ: Պետությունը պետք է շատ զգույշ, խնամքով ու խելամիտ տնօրինի առողջապահության ոլորտի եղած հատկացումները: Ճիշտ տնտեսվարման պարագայում ոլորտի զարգացման համար կստեղծվեն իրական նախադրյալներ»:

Նա իր խոսքում ֆինանսական հնարավորությունները կարևորելով, սակայն, ոլորտի կայացման համար առաջին նախապայմանը համարեց անկեղծ հոգածությունն ու սրտացավ վերաբերմունքը: «Ինչ խոսք, նյութական հնարավորություններն ու միջոցները շատ կարևոր են ինչպես մեր բնագավառում, այնպես էլ կյանքում առհասարակ: Բայց, մեղմ ասած, սխալ պատկերացում է` ամեն հաջողություն կամ անհաջողություն կապել բացառապես փողի ու նյութական հնարավորությունների հետ: Կայացած ու կանգուն առողջապահական համակարգ հնարավոր է ունենալ առաջինը` սրտացավությամբ ու տիրոջ զգացողությամբ, երկրորդը` իրական ծրագրերով ու պրոֆեսիոնալ մոտեցմամբ»,- ասաց նա: