Փաշինյանը կհանդիպի Գագիկ Ծառուկյանի եւ ՀՅԴ–ի հետ

ՀՀ վարչապետ Նիկոլ Փաշինյանը Փարիզում նախագահ Արմեն Սարգսյանի հետ քննարկել է եկրում ստեղծված վիճակը։ Այս մասին այսօր՝ հոկտեմբերի 8-ին, լրագրողների հետ զրույցում ասաց Նիկոլ Փաշինյանը։

«Կարծեմ ամսի 9-ին է վերադառնում, մենք նորից կքննարկենք վիճակը»,–հավելեց Փաշինյանը։

Հարցին, թե արդյոք նախագահը կստորագրի ԱԺ ընդունած աղմկահարույց օրինագիծը, Փաշինյանն ասաց, որ չի կարող ասել, թե ինչպիսին կլինեն նախագահի գործողությունները։

«Կարծում եմ ինքը հայտարարություններ կանի, բայց ես կարծում եմ, որ իմ Փարիզում գտնվելու ընթացքում որոշակի իրադարձություններ են տեղի ունեցել, որոնք անպայման մենք հաշվի կառնենք։ Մասնավորապես «Բարգավաճ Հայաստան» կուսակցության ղեկավար Գագիկ Ծառուկյանի հարցազրույցը եւ ըստ էության նա պաշտպանեց դեկտեմբերին արտահերթ ընտրություններ անցկացնելու գաղափարը։ Ես պատրաստվում եմ ննաեւ այդ հարցազրույցի արդյունքներով նաեւ հանդիպել պարոն Ծառուկյանի հետ, որպեսզի մենք իրավիճակը եւ հանգուցալուծման սցենարների վերաբերյալ պատկերացումները քննարկենք։ Կարծում եմ՝ Դաշնակցության հետ նույնպես կլինի հանդիպում, որովհետեւ Փարիզում գտնվելու ընթացքում նաեւ որոշակի շփումներ են եղել Դաշնակցության սփյուռքի կառույցների ներկայացուցիչների հետ եւ կարծում եմ, որ կլինի քննարկում»,–ասաց նա։

Փաշինյանը ասաց, որ ստեղված իրավիճակում ինքը դե յուրե է հրաժարական տալիս, սակայն դե ֆակտո հրաժարական չի տալիս։

«Այստեղ ինչն է նրբությունը, ես տեսնում եմ,որ հիմա շատ մեծ հանրային անհագստություն, դժգոհություն կա դրա հետ կապված։ Ես չեմ ուզում նմանվել այն իշխանություններին, որ երկար տարիներ հանրությունը պահանջում է նրանց հրաժարականը, սակայն նրանք համառորեն հրաժարական չեն տալիս, հիմա էլ երբ հանրությունը պահանջում է հրաժարական չտալ, իշխանությունը համառորեն հրաժարական է տալիս, բայց պետք է այնպես անենք, որ այս իրավիճակը հանրությանը հասկանալի լինի իր բոլոր նրբություններով, քանի որ որեւէ գործողություն ես չպետք է անեմ ժողովրդի իշխանությունը թեկուզ տեսականորեն վտանգի տակ դնելու համար։ Բայց մենք պետք է արտահերթ ընտրություններ անենք, ինչպես ես ասացի այս բարիկադային ռեժիմից անցնելու առօրյա աշխատանքային ռեժիմի եւ կոնկրետ արդյունքների հասնենք»,– ընդգծեց վարչապետը։