ԿԸՀ-ն որոշել է Երեւանի ավագանու ընտրություններին որպես դիտորդ հրավիրել ICES-ին
Այսօր՝ օգոստոսի 31-ին, Կենտրոնական ընտրական հանձնաժողովն իր հերթական նիստում կայացրել է որոշում՝ Երեւանի ավագանու սեպտեմբերի 23-ի արտահերթ ընտրություններին դիտորդական առաքելություն իրականացնելու նպատակով հրավիրել Ընտրական համակարգերի միջազգային փորձագիտական կենտրոնին (ICES):
Կենտրոնական ընտրական հանձնաժողովն էլեկտրոնային վիճակահանությամբ բաշխել է նաեւ Երեւանի ավագանու ընտրությունների տեղամասային ընտրական հանձնաժողովների նախագահների եւ քարտուղարների պաշտոնները Ազգային ժողովում խմբակցություն ունեցող կուսակցությունների, կուսակցությունների դաշինքների միջեւ: Արտահերթ ընտրությունների համար ձեւավորված թվով 475 տեղամասային ընտրական հանձնաժողովների նախագահների եւ քարտուղարների պաշտոնները բաշխվել են հետեւյալ համամասնությամբ՝
Հայաստանի Հանրապետական կուսակցություն ` 262-ական,
«Ծառուկյան» կուսակցությունների դաշինք ` 140-ական,
«Ելք» կուսակցությունների դաշինք ` 41-ական,
Հայ Յեղափոխական Դաշնակցություն ՝ 32-ական:
Տեղամասային ընտրական հանձնաժողովներում անդամներ նշանակելու մասին հայտերը Կենտրոնական ընտրական հանձնաժողով կարող են ներկայացվել սեպտեմբերի 3-ից 5-ը` մինչեւ ժամը 18.00-ն: