Կոռուպցիան վնաս է հասցրել Հայաստանի շրջակա միջավայրին. France 24

France 24 հեռուստաընկերությունը սյուժե է ներկայացրել Հայաստանում հանքարդյունաբերության վտանգների մասին՝ «Ինչպես է կոռուպցիան վնասել Հայաստանի շրջակա միջավայրին» վերնագրով: Ռեպորտաժում նշվում է, որ վերջերս Հայաստանում տեղի ունեցած բողոքի ակցիաների պատճառը կոռուպցիան էր, որի դիպչել է նաեւ այս ոլորտին: «Բաց արդյունահանումը սպի է թողել փոքրիկ երկրի գեղեցիկ լանդշաֆտների վրա»,- նշում են սյուժեի հեղինակները:

Ռեպորտաժը պատմում է Թեղուտի պղնձամոլիբդենային հանքավայրի բնությանը հասցված վնասի մասին: Ինչպես հեռուստաընկերության հետ հարցազրույցում նշել են գյուղացիները, իրենք չեն կարող օգտագործել գետի ջուրը, քանի որ այն վարակված է, թեպետ ընկերությունը հերքում է, որ վտանգավոր տոքսինների արտահոսք է եղել: Սակայն տեղացիներից ոմանք կցանկանային, որպեսզի ընկերությունը վերսկսի իր գործունեությունը, որպեսզի իրենք աշխատանք ունենան:

Սյուժեի հեղինակների խոսքով՝ հարեւան Նոյեմբերյանում կարծում են, որ իրենց մոտ տնտեսությունը կարելի է զարգացնել զբոսաշրջության միջոցով, այլ ոչ թե՝ հանքարդյունաբերության: Բնապահպան ակտիվիստների հետ միասին նրանք պայքարում են ընկերության դեմ, որը մտադիր է սկսել աշխատանքները քաղաքից քիչ հեռու: Ընդ որում, ռեպորտաժում նշվում է, որ ակտիվիստերը չեն կարծում, որ նոր կառավարությունն ամբողջությամբ կփոխի իրավիճակն այց հարցում, սակայն հույս ունեն, որ ժողովրդավարական կառավարությունն ավելի շատ կլսի իրենց: