Չկա որևէ իրավական մեխանիզմ, որով ԵԱՏՄ անդամ x թվով պետությունները կարող են Y-ին կամ Y-ներին հանել ԵԱՏՄ-ից. Միրզոյան

Մեզ հայտնի չէ որևէ իրավական մեխանիզմ, որով ԵԱՏՄ անդամ x թվով պետությունները կարող են Y-ին կամ Y-ներին հանել ԵԱՏՄ-ից, նույնիսկ` սառեցման մեխանիզմ: Այդ մասին խորհրդարանական ճեպազրույցի ժամանակ ասաց ԱԳՄԱ նախարար Արարատ Միրզոյանը՝ անդրադառնալով ԵԱՏՄ-ին Հայաստանի անդամակցության կասեցման մասին Եվրասիական միջկառավարական խորհրդի՝ Ռուսաստանի, Բելառուսի, Ղազախստանի և Ղրղզստանի անդամների ներկայացրած զեկույցին, որը երեկ է հրապարակվել:

Ըստ Միրզոյանի՝ փաստաթուղթը ծավալուն է, որին հայկական կողմն այս պահին ծանոթանում է, և այն վերլուծելուց հետո կձևավորվեն ՀՀ վարքագիծն ու դիրքորոշումը:

«Մենք կուսումնասիրենք և ռեակցիա կտանք:

Անշուշտ, բարեկեցությունը մեր քաղաքացիների, առևտուրը, տնտեսական շահը, ավանդական կապերը ՌԴ-ի հետ, ԵԱՏՄ մյուս անդամների հետ մեզ համար կարևոր են, բայց կա մի բան, որ գերկարևոր է, և կարևոր է ամեն ինչից, դա ՀՀ ինքնիշխանությունն է, անկախությունն է»,- ասաց նա:

Ինչ վերաբերում է գազի գնի հնարավոր բարձրացմանը, Արարատ Միրզոյանը չբացառեց, որ վնասներ կարող են լինել:

«Եթե ռուսական կողմը որոշի հանկարծ գազի գինը միակողմանիորեն բարձրացնել, չգիտեմ՝ ինչքանով է դա գործընկերային, և ինչքանով է արտացոլում մեր հարաբերությունները Ռուսաստանի հետ, բայց կլինի իրավիճակ, կհասկանանք»,- ասաց նա:

Նախարարը նաև նշեց, որ ՌԴ-ի հետ արդեն իսկ կա նախնական ընկալում այն մասին, որ հայկական և ռուսական կողմերը պետք է գույքագրեն, թե ինչ ունեն: