Ռուսաստանի վրա ճնշումը մեծացնելու դիմաց Թրամփը պահանջում է եվրոպացի դաշնակիցների օգնությունը Հորմուզի նեղուցում. Politico

ԱՄՆ նախագահ Դոնալդ Թրամփը պատրաստակամություն է հայտնել աջակցել Ուկրաինային և մեծացնել ճնշումը Ռուսաստանի վրա՝ պատերազմը դադարեցնելու համար, սակայն դրա դիմաց նա պահանջել է եվրոպացի դաշնակիցների օգնությունը Հորմուզի նեղուցի ականազերծման հարցում, Politico-ին հայտնել են տեղեկացված աղբյուրները: Նրանց խոսքով՝ Սպիտակ տան ղեկավարը այս հայտարարությունն արել է G7 գագաթնաժողովի փակ բանակցությունների ժամանակ։

G7-ի առաջնորդները հստակեցրել են, որ պատրաստ են օգնել Հորմուզի նեղուցը մաքրելու հարցում, սակայն անհրաժեշտ են որոշակի պայմաններ: Ֆրանսիայի նախագահ Էմանուել Մակրոնը, Politico-ի աղբյուրների խոսքով, ընդգծել է, որ ականազերծման համար նավեր ուղարկելը հնարավոր է միայն ԱՄՆ-ի պաշտոնական խնդրանքի և մյուս կողմերի, մասնավորապես՝ Իրանի և Օմանի համաձայնության դեպքում։

Չնայած այս հարցի շուրջ համաձայնություն ձեռք չի բերվել, Գերմանիայի կանցլեր Ֆրիդրիխ Մերցը «լավատես» է Թրամփի հետ բանակցություններից հետո: Politico-ն նշում է, որ Թրամփի և Ռուսաստանի նախագահ Պուտինի վերջին հեռախոսազրույցից հետո եվրոպացի առաջնորդները մտահոգված էին, որ Սպիտակ տան ղեկավարը կարող է ճնշում գործադրել Ուկրաինայի վրա՝ տարածքային զիջումներ կատարելու համար։

Սակայն ամերիկացի առաջնորդը անսպասելիորեն հայտարարել է, որ Միացյալ Նահանգները պատրաստ է վերականգնել խիստ պատժամիջոցները Ռուսաստանի նավթային ոլորտի դեմ: «Ռուսաստանը պետք է գործարք կնքի»,- ընդգծել է Թրամփը։