«Խաղաղության խաչմերուկ» նախագիծը մտել է գործնական փուլ. Փաշինյան

Նորք-Մարաշում բնակիչների հետ հանդիպման ժամանակ վարչապետ Նիկոլ Փաշինյանը հայտարարել է, որ կառավարության «Խաղաղության խաչմերուկ» նախագիծն արդեն մտել է գործնական իրագործման փուլ։

Վարչապետի խոսքով՝ դրա կարևոր վկայություններից մեկն ԱՄՆ պետքարտուղարի վերջերս իրականացրած կարճատև այցն էր Հայաստան, որի ընթացքում Հայաստանի արտաքին գործերի նախարարի հետ ստորագրվել է TRIPP նախագծի իրականացման վերաբերյալ համաձայնագիր։

«Այն փաստը, որ ԱՄՆ պետքարտուղարը հատուկ մեկ ժամով այցելեց Հայաստան՝ այդ փաստաթուղթը նախաստորագրելու համար, ընդգծում է տեղի ունեցածի կարևորությունը»,- նշել է Փաշինյանը։

Նա անդրադարձել է նաև վերջին տարիներին շրջանառվող «միջանցքի» թեմային՝ ընդգծելով, որ ԱՄՆ-ի հետ ստորագրված համաձայնագրում հստակ ամրագրված է, որ նախագիծն իրականացվելու է Հայաստանի Հանրապետության տարածքային ամբողջականության, ինքնիշխանության և իրավազորության շրջանակներում։

«Փաստաթղթում լրացուցիչ ընդգծվել է, որ Հայաստանը պահպանում է լիարժեք ինքնիշխանությունը, իրավազորությունը և տարածքային ամբողջականությունը նախագծի իրականացման բոլոր գոտիների նկատմամբ»,- ասել է վարչապետը՝ հավելելով, որ գոյություն չունեցող «միջանցքի» վերաբերյալ տարիներ շարունակ շրջանառված պնդումները որևէ իրական հիմք չեն ունեցել։

Փաշինյանի խոսքով՝ նախագիծը կարևոր նշանակություն ունի նաև տարածաշրջանային ենթակառուցվածքների զարգացման տեսանկյունից։ Նա նշել է, որ առաջիկայում նախատեսվում է Մեղրիի երկաթուղու վերականգնումը, իսկ ԱՄՆ նախագահ Դոնալդ Թրամփը իր հրապարակումներից մեկում TRIPP նախագիծը բնութագրել է որպես Արևելքից Արևմուտք էներգակիրների տարանցման կարևոր երթուղի։

Վարչապետը համոզմունք է հայտնել, որ այս զարգացումները նպաստում են Հայաստանի միջազգային դերակատարության աճին և երկրի համար ստեղծում նոր հնարավորություններ։

Փաշինյանը նաև նշել է, որ 2026 թվականին Հայաստան են այցելել ԱՄՆ փոխնախագահը, ԱՄՆ պետքարտուղարը, ինչպես նաև եվրոպական մի շարք երկրների ղեկավարներ, ինչը, նրա գնահատմամբ, վկայում է Հայաստանի նկատմամբ աճող միջազգային հետաքրքրության մասին։

Անդրադառնալով մեկ այլ ենթակառուցվածքային նախաձեռնության՝ վարչապետն ընդգծել է միջազգային գործընկերների հայտարարությունները, համաձայն որոնց՝ Արևելքն ու Արևմուտքը կապող ամենակարճ երթուղին անցնում է Հայաստանի Տավուշի, Լոռու և Շիրակի մարզերով։

«Մեր միջազգային գործընկերները նշում են, որ Հայաստանը գտնվում է Արևելքի և Արևմուտքի միջև ամենակարճ ճանապարհի վրա, և այդ ճանապարհն անցնում է Տավուշով, Լոռիով ու Շիրակով։ Սա ևս մեկ անգամ ընդգծում է Հայաստանի ռազմավարական նշանակությունը տարածաշրջանում»,- հայտարարել է Նիկոլ Փաշինյանը։