Մենք մոտենում ենք վճարունակության անհաղթահարելի շեմին. Թարվերդյանը` Հայաստանի արտաքին պարտքի մասին

Արտաքին պարտքի առումով Հայաստանը մոտենում է վճարունակության անհաղթահարելի շեմին: Այս մասին NEWS.am-ին տված հարցազրույցում ասաց «Միացյալ Հայաստան» կուսակցության նախագահ Երվանդ Թարվերդյանը` պատասխանելով այն հարցին, թե ինչ վտանգներ է առաջացնում 10 միլիարդ դոլարը գերազանցող՝ Հայաստանի արտաքին պարտքը։

«Վտանգավոր է, որ մենք մոտենում ենք վճարունակության անհաղթահարելի շեմին: Ես զարմանում եմ, որ մեր պետությունը այսպիսի «տնտեսական աճ» արձանագրելով եւ այսպիսի պրոֆիցիտի պայմաններում նորից վարկ է վերցնում, այն դեպքում, երբ մյուս տարի էլ մենք նախատեսում ենք բյուջետային մուտքերի բավականին ավելացում»,- ասաց նա:

Թարվերդյանի կարծիքով` բյուջեի ձեւավորման գործընթացում պետությունը պետք է ձեւակերպի նաեւ ոչ հարկային եկամուտներ. «Մի շարք ոլորտներում պետական ձեռնարկությունների, կամ պետական մասնակցությամբ ձեռնարկությունների ստեղծումը եւ, ինչու ոչ, պետական մոնոպոլիաների ներդրումը ես անհրաժեշտ եմ համարում։ Նույն հանքարդյունաբերության ոլորտում դա կարելի է կիրառել, ի վերջո, ընդերքը մեկինը չէ, դա բոլորին է պատկանում, եւ կարելի է հսկայական եկամուտներ ստանալ, որոնք կմտնեն պետական բյուջե»:

Անդրադառնալով գնաճը զսպելու ուղղությամբ Կենտրոնական բանկի կողմից ձեռնարկվող քայլերի արդյունավետությանը՝ Թարվերդյանը նկատեց, որ Կենտրոնական բանկը չպետք է միայնակ փորձի մեղմել գնաճը` վերաֆինսավորման տոկոսադրույք բարձրացնելով, այս խնդրի լուծմանը պետք է մասնակցի նաեւ կառավարությունը` իրականացնելով արդյունավետ հարկային քաղաքականություն:

«Կենտրոնական բանկը երկու անգամ բարձրացրել է վերաֆինանսավորման տոկոսադրույքը, որը գնաճի զսպման ինչ-որ միջոց է: Մենք արձանագրում ենք, որ տարվա սկզբից Հայաստանում գրանցվել է 9 տոկոս գնաճ, սակայն չենք ասում, որ դրամի նկատմամբ դոլարի փոխարժեքի անկումը 20 տոկոսից ավելի է, այսինքն գնաճը 20 տոկոսից ավելի է: Շատ երկրներում գնաճին զուգահեռ բարձրացնում են աշխատավարձերը, մարդիկ չեն զգում գնաճը, իսկ Հայաստանում նման գնաճի պայմաններում թոշակը ավելացրել են ընդամենը 3000 դրամով»,-ասաց նա:

Թարվերդյանը կառավարությանը հորդորում է ավելի մեծ ուշադրություն դարձնել օտարերկրյա ներդրումներին, քանի որ դրանք նաեւ անվտանգության երաշխիք են:

«Ներդրում անող պետությունները թե΄ ազդեցություն են ունենում, թե΄ պաշտպանում են իրենց ներդրումները: Մեր բարեկամ Ֆրանսիան խոշորագույն ներդրողներից է Ադրբեջանի տնտեսության մեջ, 4 միլիարդ դոլարից ավելի ներդրում ունի այդ երկրի տնտեսությունում։ Թուրքիայում էլ Ֆրանսիան խոշորագույն ներդրողներից է: Հիմա մենք համարում ենք, որ Ֆրանսիան պաշտպանելու է մեզ` հայերիս, այնինչ նա ընդամենը խաղաղություն է ցանկանում: Այսինքն` ամեն երկրի տնտեսական շահով է արտահայտված նաեւ իր ներգործությունը տվյալ երկրի քաղաքականությունում»,-ասաց նա:

Նրա խոսքով` օտարերկրյա ներդրումները խոչընդոտող հանգամանք են նաեւ ոլորտի օրենսդրական սահմանափակումները, արտոնությունների պակասը, երբեմն նաեւ ավելորդ բյուրոկրատիան կամ պետական հաստատությունների կողմից գործընթացների ձգձգումները։