Տղե՛րք, չե՞ք հասկանում, որ բիրտ ուժից մենք չենք վախենալու, ավելի ենք ուժեղանալու․ Վանեցյանը՝ ոստիկաններին

Այս ընթացքում ականատես եղանք որոշ ոստիկանների կողմից բիրտ ուժի կիրառմանը, բայց ոստիկանները պետք է հասկան, որ դրանից չենք վախենում, այս մասին Ֆրանսիայի հրապարակում ընթացող հանրահավաքի ժամանակ հայտարարեց «Հայրենիք» կուսակցության ղեկավար Արթուր Վանեցյանը։

«Տղե՛րք, ոստիկաննե՛ր, չե՞ք հասկանում, որ դրանից մենք չենք վախենալու, ավելի ենք ուժեղանալու, ավելի ենք բռունցքվելու, ավելի համառ ենք գնալու պայքարի, որովհետև այս պայքարը մեր հայրենիքի համար է, յուրաքանչյուրի համար է, հայի համար է, այստեղ հայի արժանապատվությունն է»,– ասաց նա։

Վանեցյանը նշեց, որ իրենց շատ են հարցնում, թե ինչ պետք է անել, որ Նիկոլ Փաշինյանը գնա։«Ժողովուրդ, սկսել ենք արդեն անել, անում ենք, պետք է շատանանք։ Այն մարդիկ, որ հիմա նստած են տանը և մեզ աջակցում են, կամ չեն աջակցում, բայց հասկանում են, որ այս իշխանությունների մի օր մնալը երկրին վնաս է, թող դուրս գան փողոց, ինքնակազմակերպվեն»,– ասաց նա։

Արթուր Վանեցյանը նշեց, որ եթե Ֆրանսիայի հրապարակում հավաքված մարդիկ բոլորը մասնակցեն փողոցները փակելու գործողություններին, ապա երկու-երեք օրում լուծելու են Փաշինյանին հեռացնելու խնդիրը։

Արթուր Վանեցյանը նաև տեղեկացրեց, որ այսօր ուսանողներն էլ միացան իրենց պայքարին, և հիմա էլ հրապարակ են եկել շատ բժիշկներ, դախոսներ, ուսուցիչներ, պետական համակարգի ծառայողներ, որոնք տարբեր պատճառներով չեն ուզում դուրս գալ և ասել, որ իրենք այստեղ են, բայց բոլորն այստեղ են։

«Ժողովուրդ ջան, մի՛ վախեցեք, վախը անցել է, սրանք այլևս իշխանություն չունեն, ում էլ այս երկու օրվա ընթացքում կարողանան աշխատանքից ազատել, հավատացեք, բոլորը վերականգնվելու են, և մեղավորները պատժվելու են։ Որևէ մեկը չի կարողանալու հայ ազգի միասնական ուժի դեմ գործել»,– հայտարարեց Արթուր Վանեցյանը։