Տեւական արձակուրդը երկարացնում է կյանքը

Երկարատեւ արձակուրդը դրականորեն է ազդում նյարդային համակարգի վրա եւ նպաստում է երկարակեցությանը: Նման եզրահանգման են եկել Ֆինլանդիայի գիտնականները, ովքեր այդ թեմայով լայնածավալ փորձ են կատարել, հայտնում է Planet-Today-ը:

Հելսինկյան համալսարանի աշխատակիցներն ամփոփել են փորձնական ուսումնասիրության արդյունքները, որին մասնակցել են 1200 կամավորներ: Փորձի մասնակիցները բաժանվել են երկու խմբի` ըստ կենսակերպի եւ արձակուրդի տեւողության: Գիտնականները պարզաբանում են, որ կամավորների մի կեսի առողջությունն ու կենցաղը խստորեն վերահսկվել են մասնագետների կողմից (պարտադիր ֆիզիկական գործունեություն, ծխելու եւ ալկոհոլի չարաշահման արգելք եւ այլն), սակայն նրանք ունեցել են համեմատաբար կարճ արձակուրդ` տարեկան երեք շաբաթից պակաս:

Կամավորների երկրորդ խումբը ոչ մի կերպ չի վերահսկվել, ուստի այդ մարդիկ կարող էին ցանկացած ապրելակերպ վարել: Սակայն արձակուրդի երկարությունը տարեկան ավելի քան երեք շաբաթ է եղել: Գիտափորձը, որը տեւել է քառասուն տարի, ավարտվել է բավական անսպասելի եզրակացություններով:

«Առաջին խմբի կամավորների մոտ դիտարկվեցին ֆիզիկական լավ ցուցանիշներ, ինչպես նաեւ սրտանոթային հիվանդությունների զարգացման հավանականության նվազում, սակայն առաջին խմբում մահացության մակարդակը երեսունյոթ տոկոսով բարձր էր երկրորդից: Վստահ ենք, որ երկար արձակուրդը բարենպաստ ազդեցություն է ունենում նյարդային համակարգի առողջության վրա, հետեւաբար, ընդհանուր առմամբ, այն երկարացնում է կյանքը»,- ասում են ուսումնասիրության հեղինակները: