Սա մի երկիր է դարձել, որտեղ կարող են հաշված րոպեների ընթացքում բարոյապես փչացնել մարդուն. Անի Սամսոնյան

ԱԺ «Լուսավոր Հայաստան» խմբակցության պատգամավոր Անի Սամսոնյանը ֆեյսբուքյան իր էջում գրառում է արել՝ անդրադառնալով Հանրային խորհրդի նախագահի կողմից երեկ Ռոբերտ Քոչարյանի կալանքը գրավով փոխարինած դատավորի հետ «Իրավական ուղի» ՀԿ համանախագահ Ռուբեն Մելիքյանի եւ ԼՀԿ պատգամավոր Տարոն Սիմոնյանի լուսանկարի հրապարակմանն ու նրանց, այդ թվում՝ Ռուբեն Մելիքյանի որդուն «թիրախավորելուն»:

Նա, մասնավորապես, նշել է. «Սա մի երկիր է դարձել, որտեղ կարող են հաշված րոպեների ընթացքում բարոյապես փչացնել մարդուն եւ խաչ քաշել նրա կյանքի ու կենսագրության վրա:

Կարող են այդ մարդու ընտանիքը թիրախավորել եւ բորենու հոգեբանությամբ հարձակում գործել:

Երեկ այն ինչ տեղի ունեցավ դատավոր Արսեն Նիկողոսյանի եւ Արցախի նախկին ՄԻՊ, իրավապաշտպան Ռուբեն Մելիքյանի, ինչպես նաեւ իմ գործընկեր Տարոն Սիմոնյանի նկատմամբ ցույց է տալիս այն, որ ոչ պետություն ենք ուզում, ոչ էլ իրավունք: Դրանք ունենալու համար չես կարող վճարել այսքան ատելությամբ:

Ով է Հանրային խորհրդի նախագահը, որ պիտի հայհոյանք բերի իր էջում մարդկանց եւ նրանց ընտանիքի նկատմամբ: Ով է Հանրային խորհրդի նախագահը, որ պետք է որոշի, թե Մարդու իրավունքների պաշտպանը ում պաշտպանն է եւ հարգանք չցուցաբերի ոչ այդ ինստիտուտի, ոչ էլ պաշտոնյայի նկատմամբ:

Ով է պատասխանատու նրա հակահիգիենիկ, հակասոցիալական եւ նողկալի վարքագծի համար այստեղ:

Ում պատճառով են մարդկանց միջավայրը թունավորում վրեժխնդրությունից կուրացած եւ սպառված հոգիներն ու ուղեղները:

Ով է նրան նշանակել Հանրային խորհրդի նախագահ: Ով է ծնել եւ սնում նրա նմաններին:

Կարծում եմ պատասխանը գիտեք»: