Բրիտանիայում գլխուղեղի ուռուցքի վիրահատության ընթացքում բժիշկներն արթնացրել են հիվանդին և խնդրել ջութակ նվագել (տեսանյութ)

Լոնդոնի Թագավորական քոլեջի հիվանդանոցի մասնագետները վիրահատել են 53-ամյա Դագմար Թերներին, որի մոտ 2013 թվականին գլխուղեղի ուռուցք էր ախտորոշվել:

Ինչպես հայտնում է Daily Mail-ը, ջութակահարուհու մոտ դանդաղ զարգացող ուռուցքը հայտնաբերվել էր սինֆոնիկ համերգի ժամանակ տեղի ունեցած ուշաթափությունից հետո:

Կինը ռադիոթերապիա է անցել, սակայն ուռուցքը շարունակում էր մեծանալ: Այն տեղակայված է եղել գլխուղեղի դիմային հատվածի աջ անկյունում: Այդ հատվածը պատասխանատու է ձախ ձեռքի աշխատանքի համար, որը էական նշանակություն ունի երաժշտական գործունեության համար:

Նշվում է, որ վիրաբույժներն արթնացրել են նրան վիրահատության կեսից և խնդրել են, որ ջութակ նվագի:

Այդ մոտեցումը թույլ է տվել մասնագետներին բնորոշել և խուսափել նվագելիս ուղեղի ակտիվ հատվածը վնասելուց: Նրանց հաջողվել է հեռացնել ուռուցքի 90 տոկոսը: Կինն այժմ տանն է, ընտանիքի հետ: Նա ապաքինվում է: