Նիկոլ Փաշինյանի հուժկու պատասխանը ԵԽԽՎ-ին

Հունվարի վերջին օրը շատերի համար անսպասելի ԵԽԽՎ Հայաստանի հարցերով համազեկուցողները հանդես եկան պաշտոնական հայտարարությամբ՝ ՀՀ կառավարությանը հորդորելով զերծ մնալ ՍԴ-ի վրա ճնշումներ գործադրելուց:

ԵԽԽՎ-ն, փաստորեն շատ պարզ, մատչելի լեզվով հասկացրեց, որ անհանգստացած են այն լարմամբ, որ կա վարչապետի աշխատակազմի եւ ՍԴ նախագահության միջեւ: Ավելին, նրանք կոչ արեցին քարուքանդ չանել զսպումների ու հակակշիռների կենսական դեր ունեցող մեխանիզմները: 

Կարճ ասած, ԵԽԽՎ-ն ՀՀ կառավարությանը շատ հստակ կոչ արեց ձեռնպահ մնալ դատական համակարգի, մասնավորապես Սահմանադրական դատարանի վրա ճնշումներ գործադրելուց:  

Բնականաբար, ՀՀ քաղաքացիները սպասում էին, թե ինչպես է այս կոչին, հայտարարությանն արձագանքելու ՀՀ վարչապետ Նիկոլ Փաշինյանը: Իհարկե, ծանոթանալով ԵԽԽՎ-ում Հայաստանի ներկայացուցչի, ԱԺ իմքայլական պատգամավորների տարօրինակ հայտարարություններին, կարելի էր կռահել, թե ինչպիսին է լինելու կառավարության ղեկավարի արձագանքը, բայց այնուամենայնիվ կարեւոր էր լսել, կարդալ նրա խոսքը:

Նիկոլ Փաշինյանն արձագանքեց, բայց յուրահատուկ ոճով:

Փետրվարի մեկի վաղ առավոտյան նա գրեց. «Երկար տարիներ Հայաստանը ջանքեր էր գործադրում իր բարձր տեխնոլոգիական ոլորտը զարգացնելու համար, բայց այս ուղղությամբ իրական զարգացումներ մեկնարկեցին միայն 2018 թվականի հեղափոխությունից հետո:

Աշխարհի քարտեզի խորխորատներում թաքնված փոքր, աննկատ երկիրը անսպասելիորեն հույսով լցվեց դեպի ապագան, որը արտասովոր կերպով պայծառ է թվում»: Կից նա կցեց «Ֆորբսում» Հայաստանի մասին պատմող սովորական հոդվածը:

Համաձայնեք այստեղ ԵԽԽՎ հայաստանյան հարցերով համազեկուցողների հայտարարության վերաբերյալ ոչինչ չկար:

Այս գրառումից մեկուկես ժամ անց վարչապետը գրեց. «Առատ ձյունը մեծացնում է բարենպաստ տնտեսական տարվա մեր սպասումները: 2020-ը բերքառատ տարի է լինելու եւ ոչ միայն գյուղատնտեսական իմաստով:)»:

Կրկին ոչ մի խոսք ԵԽԽՎ հայտարարության մասին:

Ցերեկվա ժամը երկուսի մոտ Փաշինյանը ՀՀ հպարտ քաղաքացիներին տեղեկացրեց. «2019 թվականի ընթացքում Հայաստանում օտարերկրյա բանկային քարտերով կատարվել է 4.9 միլիոն գործարք»:

Թե ինչ է շահելու այս ամենից ՀՀ շարքային քաղաքացին դժվար է ասել, թե ինչ է տալու այս ամենը Հայաստանին, երբ ՀՀ բազմաթիվ քաղաքացիներ օգտվում են օտարերկրյա բանկերի քարտերից, դժվար է ասել, բայց փաստ է, որ սա եւս ԵԽԽՎ-ին ուղղված պատասխան չէր:

16:24-ին Նիկոլ Փաշինյանը տեղեկացրեց, թե քննարկել են կանխիկ շրջանառության կրճատման հնարավորությունները:

Իհարկե, այս թեման եւս որեւէ կապ չունի ԵԽԽՎ-ի խիստ կարեւոր հայտարարության հետ:

Երկու ժամ անց Փաշինյանը կրկին վիճակագրական տվյալներ ներկայացրեց. «Կենտրոնական բանկը հունվարի 31-ին իրականացրել է եւս 17.8 միլիոն դոլարի գնում՝ արտարժույթի շուկայից: Հունվարի գնումների ծավալը այսպիսով, դարձավ 37.8 միլիոն դոլար»:

Դժվար է ասել, թե այս ամենն ինչ կապ ունի ՍԴ-ի շուրջ առաջացած լարվածության եւ ԵԽԽՎ հայտարարության հետ, բայց ունենք այն, ինչ ունենք:

 Երեկոյան Փաշինյանն արդեն ընտանեկան միջավայրում էր, իսկ կիրակի որեւէ գրառում չարեց:

Ահա հենց այս գրառումներով էլ Փաշինյանը հուժկու պատասխան տվեց ԵԽԽՎ հայտարարությանը:

Վարդան Մխիթարյան

Top-News.am