ԱՄՆ նախագահը հանել է հակահետեւակային արկերի օգտագործման արգելքը

ԱՄՆ նախագահ Դոնալդ Թրամփը հանել է հակահետեւակային արկերի օգտագործման արգելքը, որ սահմանել էր նրա նախորդը՝ Բարաք Օբաման, հայտնում է DW-ն՝ հղում կատարելով Պենտագոնի եւ Սպիտակ տան հայտարարությանը։

Ընդ որում, այժմ թույլատրվում է օգտատործել միայն ժամանակակից հակահրետանային արկեր, որոնք հագեցած են ինքնավնասազերծման մեխանիզմով եւ կարող են հեռահար ապաակտիվացվել։ Նման գործառույթ չունեցող հակահրետանային արկերը արգելված են մնում։

Արգելքը հանելն անհրաժեշտ է, որ ամերիկյան զինվորները ԱՄՆ-ի հակառակորդների հետ հակամարտության դեպքում անշահավետ իրավիճակում չհայտնվեն, նշում է Սպիտակ տան մամուլի ծառայությունը։ Որոշումն ընդունվել է այն միջոցառումների շրջանակում, որ Թրամփը պլանավորել է, որպեսզի բանակն ավելի ճկուն եւ շարժունակ դարձնի, ասվում է հայտարարության մեջ։

Հաշմանդամների միջազգային կազմակերպությունը (Handicap International) կտրուկ քննադատել է արգելքը հանելու որոշումը՝ անվանելով այն «խաղաղ բնակչության անվտանգությանը հասցված պատմական հարված»։ Ցամաքային արկերի մասին Թրամփի որոշումը կարող է մահվան դատավճիռ դառնալ անմեղ մարդկանց համար, Handicap International-ի հայտարարությունն է մեջբերում KNA տեղեկատվական գործակալությունը։

Տարեկան հակահետեւակային արկերից զոհվում են հազարավոր մարդիկ։ 1997թ․ ավելի քան 150 երկրներ ստորագրել են Հակահետեւակային արկերի արգելման Օտավայի կոնվենցիան, որի տակ իրենց ստորագրություններն են դրել նաեւ ԱՄՆ-ը եւ Ռուսաստանը։ 2014թ․ Բարաք Օբաման արգելք էր սահմանել հակահետեւակային արկերի վրա։ Դրանց օգտագործումը ամերիկյան զինվորների կողմից թույլատրվում էր միայն Հյուսիսային եւ Հարավային Կորեաների սահմանին։