British Airways-ը դադարեցրել է չվերթները դեպի Չինաստան

British Airways ավիաընկերությունը նոր կորոնավիրուսի պատճառով դադարեցրել է բոլոր չվերթները դեպի Չինաստան: Այս մասին տեղեկացնում է cityam.com կայքը:

Ավիաընկերության ներկայացուցիչը տեղեկացրել է, որ Մեծ Բրիտանիայի արտգործնախարարության հրամանով մինչև մարտ ամիսը դադարեցվել է ավիահաղորդակցությունը Չինաստանի հետ: Ավիաընկերությունը ներողություն է խնդրել ուղևորներից և նշել, որ նրանց և անձնակազմի անվտանգությունն իրենց համար առաջնահերթ է:

Չինաստանում կորոնավիրուսի նոր տեսակի առաջացրած թոքաբորբով հիվանդացածների ընդհանուր թիվը հասել է 6000-ի, որից 132-ը մահացել է, ասվում է ՉԺՀ առողջապահության պետական կոմիտեի տարածած հայտարարության մեջ:

Հիվանդության դեպքեր են գրանցվել նաև Ավստրալիայում, Վիետնամում, Հարավային Կորեայում, Մալայզիայում, Նեպալում, Սինգապուրում, ԱՄՆ-ում, Թաիլանդում, Ֆրանսիայում, Կամբոջայում և Ճապոնիայում:

Մեկ օր առաջ Չինաստանի Ժողովրդական Հանրապետության կանխարգելման և վերահսկման ազգային կենտրոնի գիտնականները շրջակա միջավայրի վերլուծություն են իրականացրել և հաստատել են, որ 2019-nCoV-ի հավանական աղբյուրն Ուհան նահանգի Հուանանի մեծածախ առևտրի շուկան է: