Հայաստանի կառավարությանը զգուշացնում են հետ կանգնել ավտորիտարիզմ տանող ճանապարհից

Կենտրոնամետ դեմոկրատների միջազգային միության (CDI) Գործադիր կոմիտեն, որի հերթական նիստը տեղի է ունենում Ինդոնեզիայում, այսօր ընդունել է Հայաստանում քաղաքական իրավիճակի վերաբերյալ բանաձեւ:

Սա այն բանաձեւերից չէ, որը կշտապի ֆեյսբուքում տեղեդրել ՀՀ վարչապետը: Ընդհակառակը, իշխանության սպասարկուներն ամեն ինչ անելու են, որ այս բանաձեւի մասին հնարավորին չափ քիչ մարդ իմանա, միաժամանակ փորձելով տպավորություն ստեղծել, թե Կենտրոնամետ դեմոկրատների միջազգային միությունը հեղինակոեւթյուն եւ ազդեցություն չունեցող կառույց է: 

Իսկ բանաձեւում անդրադարձ է կատարվում Հայաստանում ժողովրդավարության խնդիրներին, մամուլի ազատությանը, դատական համակարգի քաղաքականացվածությանը եւ Սահմանադրական դատարանի նախագահ Հրայր Թովմասյանի դեմ իրականացվող ճնշումներին:

Որպես տեղեկանք նշենք, որ Կենտրոնամետ դեմոկրատների միջազգային միությունը հանդիսանում է համաշխարհային ամենախոշոր եւ ազդեցիկ քաղաքական կառույցներից մեկը: 

Փաստորեն այս մեկուկես տարվա «հեղափոխական» գործընթացները հանգեցրին նրան, որ միջազգային հեղինակավոր կառույցներից մեկը մեր երկրին կշտամբում է հակաժողովրդավարական եւ հակաիրավական քայլեր իրականացնելու եւ դեպի ավտորիտարիզմ տանող քայլերի համար:

Անկեղծ ասած, հաճելի չէ, երբ գլորվում ես այնտեղ, որ այսպիսի բանաձեւեր են ընդունվում: 

Աննա Բաղդասարյան

Top-News.am