Ակնհայտ է, որ իշխանությունն առաջնայինը երկրորդականից չի տարբերում, կարևորը շոու ապահովելն է. Դավիթ Խաժակյան

Չեմ զարմանում վարչապետի այն հայտարարությունից, որ հաջորդ Ամանորին 570 մլն դրամ կծախսվի, որովհետև թե՛ Կառավարությունը, թե՛ քաղաքային իշխանությունն ակնհայտ է, որ առաջնայինը երկրորդական ծախսերից չեն տարբերում: Այս մասին Tert.am-ի հետ զրույցում ասաց Երևանի ավագանու «Լույս» խմբակցության ղեկավար Դավիթ Խաժակյանը:

«Իրենք կարող են համայնքային, մարզային ծննդատները փակել և շեշտը դնել տոնական միջոցառումների վրա, մարդկանց համար շոուն ապահովել: Դա արդեն մեզ ծանոթ գործելաոճ է, որին գնահատական տալու առանձնապես կարիք չկա: Այդ 570 մլն դրամով հաստատ կարելի էր մի քանի ծննդատուն պահել, Երևանի խնդիրների մասին էլ չեմ խոսում»,- նշեց Դավիթ Խաժակյանը:

Հիշեցնենք, որ վարչապետ Նիկոլ Փաշինյանը նախօրեին իր ֆեյսբուքյան ուղիղ եթերում՝ անդրադառնալով Երևանում Ամանորի տոնակատարությունների համար տրամադրված 271 միլիոն դրամին, հայտարարել էր, որ 2019թ. դեկտեմբերի 26-ից 2020թ. հունվարի 6-ն ընկած ժամանակահատվածում նախորդ տարվա համեմատ 9 միլիարդ 307 միլիոն դրամի հավելյալ շրջանառություն է կատարվել Հայաստանում.

«Ես ուզում եմ խոսել այն քաղաքացիների հետ, որոնք դեռ կասկածում էին, որ արդյո՞ք արժեր Ամանորին այդքան ծախս անել: Այս տվյալները տեսնելով՝ մենք մյուս Ամանորին ավելի մասշտաբային պետական ծախսեր պետք է անենք»,- ասել էր նա:

Ավելի ուշ Կառավարություն-ԱԺ հարցուպատասխանին՝ պատասխանելով հարցին, թե ինչու են հայերը կրկին նախընտրել Ամանորին այցելել Թբիլիսի՝ Նիկոլ Փաշինյանն ասել էր. «Մյուս տարի Կառավարությունը ոչ թե 271 մլն դրամ կծախսի Ամանորի միջոցառումների համար, այլ՝ 570 մլն դրամ: Սրանով ոչ միայն օտարերկրյա զբոսաշրջիկների կհրավիրենք Հայաստան, այլև կօգնենք, որ ՀՀ քաղաքացիներն Ամանորը նշեն Հայաստանում»:

Դավիթ Խաժակյանը կարծիքով՝ Թբիլիսիում Ամանորն անցկացնելու առիթը ոչ թե միջոցառումների ծախսերն են, այլ քաղաքի հարմարավետությունը, տուրիստական ենթակառուցվածքների առկայությունը:

«Թբիլիսիում միջոցառումների ծախսերը այդքան մեծ չեն, Երևանը հակառակը, ունի միջոցառումներ, չունի տուրիստական ենթակառուցվածքներ: Կարծում եմ՝ այս համեմատականի մեջ մենք պետք է առավելությունը տանք ոչ թե մի քանի օրյա միջոցառումներին, այլ ենթակառուցվածքների զարգացմանը: Ավելի շատ գումար ծախսենք, որպեսզի հնարավորինս քիչ գնան, ակնհայտ է, որ մեկը մյուսի հետ կապ ունենալ չի կարող»,- ասաց Խաժակյանը:

«Լույս» խմբակցության ղեկավարի խոսքով՝ հայերը նախընտրում են Ամանորին գնալ Վրաստան մի շարք պատճառներով, մասնավորապես, հյուրանոցների, տների անհամեմատ էժան լինելու համար:

«Մարդիկ այլընտրանք են փնտրում, գոնե Երևանից դուրս անցկացնեն տոնական միջոցառումները: Դա կարող էր լինել Հանրապետության որևէ այլ մարզում, բայց քանի որ մեր հանգստյան գոտիներում, հատկապես՝ Ամանորին, գներն այնպիսին են, որ դրանք գերազանցում են շատ ավելին, քան, եթե մարդ հասնի հարևան երկիր, բնականաբար, մարդիկ նախապատվությունը տալիս են երկրորդին: Այսինքն՝ պետք է հասկանանք, որ մարդիկ, որոնք գնում են Վրաստան, նրանք նախընտրում են հանգիստն անցկացնել գոնե Երևանից դուրս: Հիմա բերել են, ամբողջ միջոցառումները կենտրոնացրել են Երևանում, տրամաբանությունը ո՞րն է»,- ասաց նա:

Ինչ վերաբերում է վարչապետի այն հայտարարությանը, որ Երևանում Ամանորին ծախսված 271 միլիոն դրամի արդյունքում է 9.3 մլրդ դրամով աճել շրջանառությունը, Դավիթ Խաժակյանը նշեց, որ ներկայացված ցուցանիշները արժանահավատ չեն:

«Իսկապես, հաշվարկման տրամաբանությունն անհասկանալի է: Այդ թվերը վիճահարույց են, արժանահավատ չեն, ինչպես շատ ու շատ այլ թվեր, որ հնչեցնում է կառավարությունը: Մյուս կողմից պետք է հաշվի առնենք, եթե համերգին մարդկանց ներկայությունն այնքան չէր, որ համեմատական լիներ այդ թվերի հետ, ինչպես են միջոցառումները կապվում այդ թվերի հետ: Նախ, պետք է այդ միջոցառումներին մարդիկ մասնակցած լինեին, նոր մնացածը»,- նկատեց նա: