ԱԺ դահլիճում կոռեկտության սահմաններում մնացեք, եթե պետք է՝ կգնանք դուրսն իրար կծեծենք. Սասուն Միքայելյան (տեսանյութ)

Ես այս ամբիոնից մեկ անգամ ելույթ եմ ունեցել և ասել եմ՝ կոռետկության սահմաններում մնացեք: Այս մասին Ազգային ժողովում հայտարարեց «Իմ քայլը» խմբակցության պատգամավոր Սասուն Միքայելյանը:

Հիշեցնենք, որ այսօր ԱԺ նիստի ամբողջ քվեարկությունն անցել է փոխադարձ մեղադրանքների, վիրավորանքների և կոռեկտության սահմաններում մնալու կոչերի ներքո:

Սասուն Միքայելյանն ընդգծեց, որ ընդդիմություն, չի նշանակում իշխանությանը քննադատել կամ բարձր խոսել, իրար վիրավորել, դիվիդենտներ շահել ժողովրդի մոտ: «Եկեք իրար հարգենք»,- ասաց պատգամավորը:

Անդրադառնալով ԼՀԿ խմբակցության պատգամավոր Անի Սամսոնյանի ելույթին, թե իշխանությունը մոլորված է, եթե կարծում է կարող է դասեր տալ ընդդիմությանը՝ Միքայելյանն ասաց. «Տիկին Սամսոնյան, ես կայքնում մոլորված չեմ եղել: Եթե խոսում եք, ասում եք մոլորվածության մասին, նշեք անունը, անունով ասեք, թե ես կայնքիս մեջ մոլորված չեմ եղել բոլոր պայմաններում, որտեղ էլ եղել եմ»:

Նա բոլոր խմբակցություններից խնդրեց ԱԺ նիստն ուրիշ բաների չվերածել: «ԱԺ նիստ է, եկեք այս շրջանակներում խոսենք, թե չէ եթե վիճաբանություն է, պետք լինի գնանք վիճենք, ծեծենք իրար, պրոբլեմ չկա: Չի կարելի այս դահլիճում նման բաներ անել, ժողովրդին ցույց տալ, թե ով է ավելի համարձակ»,- ասաց նա և վերջում ռուսերենով շնորհակալություն ասաց:

Միքայելյանի ելույթին ԱԺ-ն արձագանքեց ծափերով և ծիծաղով: