«Ես եմ սահմանադրությունը». Գերմանիայում անդրադարձել են Ռուսաստանում տեղի ունեցող վերջին իրադարձություններին

ՌԴ նախագահ Վլադիմիր Պուտինն արդեն երկրորդ անգամ է պատրաստում իր կողմից նախագահի պաշտոնը լքելը: Նպատակը հեշտ չէ` զիջել իշխանությունը` չզիջելով իշխանությունը, գրում է գերմանական Der Spiegel պարբերականը:

«Ռուս պաշտոնյաներին կարելի է պատկերացնել որպես մի բուռ երկաթի կտորներ: Ինչպես կտորներն են կպչում մագնիսին, այնպես էլ ռուս պաշտոնյաներն են կպչում «իշխանություն» անվամբ մագնիսին` դրա համար չստանալով ոչ մի կարգադրություն»,- գրում է հոդվածի հեղինակ Քրիստիան Էշը:

«Նրանք կռահում են, թե իրենցից ինչ է պահանջվում, և դա տպավորիչ միասնականության տպավորություն է թողնում, համենայն դեպս այն դեպքում, քանի դեռ մագնիսը մեկն է: Բայց ի՞նչ կլինի, եթե մագնիսները մի քանիսը լինեն»,- հավելում է նա:

Սա խնդիր է, որի հետ Վլադիմիր Պուտինը պայքարում է տասնամյակներ շարունակ: 2000 թվականի հունվարի 1-ին նախագահ Բորիս Ելցինի իրավահաջորդը դառնալուց հետո նա համախմբեց ռուսական պետությունը, կազմակերպեց այն և ամրապնդեց, այսպես կոչված, «ուղղահայաց իշխանությունը»: Դա միշտ նշանակել է իշխանության կենտրոնացում Կրեմլում և մրցակցային իշխանական օղակների վերացում: Մագնիսական դաշտը, որի շուրջ պետք է հավաքվեն երկաթե կտորները, պետք է մեկը լիներ:

Սակայն, գրում է պարբերականը, երբեմն այդ սկզբունքը հասնում է իր սահմանագծին, ինչպես, օրինակ, 2008 թվականին, երբ Պուտինը ստիպված էր 4 տարով լքել Կրեմլը, որպեսզի ենթարկվի Սահմանադրության տառին:

«Այսօր նրա առաջ այնպիսի խնդիր է, ինչպիսին 2008-ին էր, քանի որ 2024 թվականին ավարտվում է նրա 4-րդ նախագահական ժամկետը: Սակայն, ինչպես չի կարելի երկու անգամ նույն գետը մտնել, այսօրվա իրավիճակն էլ նույն կերպ տարբերվում է նախորդից: Պուտինն այլևս ցանկություն չունի վարչապետի դերում զբաղվել տնտեսական քաղաքականության մանրուքներով: Ի վերջո, նա արդեն վաղուց ապրում է այլ տարերքով` նա արտաքին քաղաքականությամբ է զբաղվում: Եվ նա այլևս երիտասարդ քաղաքական գործիչ չէ, որ կարողանա մի ժամկետով ընդմիջում վերցնել` միաժամանակ նշանառության տակ պահելով Կրեմլը»,-ասված է հոդվածում:

«Այսպիոսվ` նրա համար բնական կլիներ փոխել Ռուսաստանի սահմանադրությունն այնպես, որ Ռուսաստանը կարողանա ապրել առանց իշխանության գլխին Պուտինի կանգնած լինելու, միևնույն ժամանակ երաշխավորելով իրեն ազդեցության պահպանում և անվտանգություն: Հենց այս մասին չորեքշաբթի հայտարարեց Պուտինը»,- գրում է հեղինակը:

Իրականում, ըստ հոդվածագրի, Պուտինը չհայտարարեց սահմանադրական բարեփոխումների մասին: Սա տարբեր քայլերի մի հավաքածու է: Սա, ի թիվս այլ բաների, վերաբերում է մարզերի և շրջանային կառույցների լիազորությունների սահմանափակմանը, մի խոսքով ասած` «ուղղահայաց իշխանության» հետագա ընդլայնմանը: Բարձրաստիճան պաշտոնյաներից կազմված դեկորատիվ Պետխորհուրդը պետք է բարձրացվի, և նրա կարգավիճակը պետք է ամրագրվի Սահմանադրության մեջ:

Ենթադրություններն այն մասին, որ Պուտինը տեսնում է իր ապագան հենց այդ Պետական խորհրդում, վաղուց են հնչում, ինչպես նաև այն ենթադրությունները, որ Պուտինի համար նոր ապաստան կարող է դառնալ Անվտանգության խորհուրդը, գրում է հոդվածագիրը:

Հիշեցնենք, որ երեկ ՌԴ նախագահ Վլադիմիր Պուտինի` Դաշնային խորհրդի անդամներին ուղղված ելույթից հետո ՌԴ վարչապետ Դմիտրի Մեդվեդևը հայտարարել է, որ կառավարությունն ամբողջ կազմով հրաժարական է ներկայացնում:

Պուտինը Պետդումայում ՌԴ վարչապետի պաշտոնում առաջադրել է Դաշնային հարկային ծառայության ղեկավար Միխայիլ Միշուստինի թեկնածությունը:

Այսօր ՌԴ պետդուման լիագումար նիստի ընթացքում հավանություն է տվել կառավարության ղեկավարի պաշտոնում Դաշնային հարկային ծառայության ղեկավար Միխայիլ Միշուստինի թեկնածությանը: