Թրամփը Ղասեմ Սոլեյմանիի սպանության թույլտվությունը յոթ ամիս առաջ է տվել․ CNBC

ԱՄՆ նախագահ Դոնալդ Թրամփը իրանցի գեներալ-մայոր Ղասեմ Սոլեյմանիի սպանության թույլտվությունը յոթ ամիս առաջ է տվել, հայտնում է CNBC-ը՝ հղում կատարելով վարչակազմի հինգ ներկա եւ նախկին բարձրաստիճան պաշտոնյաներին։

Վերջինների խոսքերով՝ նախագահական հրահանգը հունիսին եղել է պայմանով, որ Թրամփը պետք է վերջնականապես ստորագրի Սոլեյմանիի սպանության ցանկացած կոնկրետ օպերացիա։

Այդ որոշումը բացատրում է, թե ինչու է Սոլեյմանիի սպանությունը այն տարբերակների ցուցակում, որոնք զինվորականները երկու շաբաթ առաջ ներկայացրել են Թրամփին՝ որպես պատասխան Իրաքում իրանական հարձակումներին, որոնց հետեւանքով սպանվել էր մեկ ամերիկացի կապալառու եւ ԱՄՆ չորս զինծառայող, հայտնել են պաշտոնյաները։

Սակայն դա ստվեր է նետում Թրամփի վարչակազմի այն արդարացումների վրա, թե Սոլեյմանին սպանվել է, որովհետեւ գրոհներ էր պլանավորում ամերիկացիների վրա։

Այն բանից հետո, երբ հունիսին Իրանը հարվածել էր ամերիկյան անօդաչուին, Թրամփի նախկին խորհրդական Ջոն Բոլթոնը նրան կոչ էր արել վրեժ լուծել եւ մեկնարկել Սոլեյմանիի սպանության օպերացիան, հայտնել են պաշտոնյաները։ Պետքարտուղար Մայք Պոմպեոն նույնպես ցանկանում էր, որ Թրամփը թույլ տա այդ սպանությունը։

Սակայն Թրամփը մերժել էր այդ գաղափարը՝ հայտարարելով, որ ինքը կգնա այդ քայլին, եթե Իրանը հատի «կարմիր գիծը» եւ ամերիկացու սպանի։

ԱՄՆ հետախուզության աշխատակիցները տարիներով հետեւել են Սոլեյմանիի տեղաշարժին։ Երբ Թրամփը ստանձնել է պաշտոնը, Պոմպեոն, որը ԿՀՎ-ի առաջին տնօրենն էր, նախագահին Սոլեյմանիի հանդեպ առավել ագրեսիվ մոտեցման կոչ է արել։

Սոլեյմանիի սպանության գաղափարը ծագել է 2017թ․։ Սակայն դա եղել է միայն Իրանի վրա «առավելագույն ճնշումների» բազմաթիվ տարրերից մեկը, ասել է նախկին բարձրաստիճան պաշտոնյան, որը մասնակցել է բանակցություններին։

Գաղափարն ավելի լրջացել է այն բանից հետո, երբ 2018թ․ ապրիլին Ջոն Բոլթոնը դարձել է ազգային անվտանգության հարցերով նախագահի խորհրդական։

Թրամփը Սոլեյմանիի սպանության օպերացիայի թույլտվությունը ստորագրել է Բաղդադում ԱՄՆ դեսպանության գրոհի փորձից հետո։

Պաշտպանության նախարար Մարկ Էսպերը երկու շաբաթ առաջ նախագահին ներկայացրել է պատասխանների մի շարք տարբերակներ, որոնց թվում՝ Սոլեյմանիի սպանությունը։ Պաշտոնյաների խոսքերով՝ նա ներկայացրել է նման գործողության դրական եւ բացասական կողմերը, սակայն հասկացրել է, որ ինքը կողմ է Սոլեյմանիի սպանությանը։

Ավելի ուշ տեղի ունեցած հանդիպման ժամանակ զինվորականները նշել են յուրաքանչյուր տարբերակի դեպքում զոհերի քանակի մասին՝ վստահեցնելով նախագահին, որ Խամենեիի օդանավակայանում ուշ գիշերին Սոլեյմանիի սպանությունը ավելի քիչ զոհերի պատճառ կդառնա, քան մյուս տարբերակները։