Ռոհանին հայտնել է, որ Իրանը ձգտում է միջուկային գործարքի ամրապնդմանը

Թեհրանը ձգտում է միջուկային գործարքի ամրապնդմանը, սահմանափակումներին հետեւելուց վերջին հրաժարումն անհրաժեշտ էր համաձայնագրում հավասարակշռություն ստեղծելու համար, հայտարարել է Իրանի նախագահ Հասան Ռոհանին Եվրախորհրդի ղեկավար Շառլ Միշելի հետ հեռախոսազրույցում:

«Իրանը եւ Եվրոպան ձգտում են տարածաշրջանում իրավիճակի կայունացմանը եւ Գործողությունների համատեղ համընդգրկուն ծրագրի ամրապնդմանը: Մեզ համար չափազանց կարեւոր է, որ Եվրոպան, Չինաստանը եւ Ռուսաստանը իրենց կարեւոր դերն ունենակ ԳՀՀԾ պահպանման մեջ՝ ապահովելով Իրանի շահերը»,- ասել է Ռոհանին, ում խոսքը հրապարակվել է նրա պաշտոնական կայքում, փոխանցում է «ՌԻԱ Նովոստի»-ն:

Իրանի նախագահի խոսքով՝ Թեհրանն անցել է միջուկային պարտավորությունների կրճատման վերջին փուլին, որպեսզի գործարքում հավասարակշռություն ստեղծի:

Իրանը 2020 թվականի հունվարի սկզբին հայտարարեց «միջուկային գործարքի վերջին առանցքային սահմանափակումից հրաժարվելու մասին, որը վերաբերում է ցենտրիֆուգերի թվին», եւ հայտարարեց, որ հիմա «Իրանի միջուկային ծրագրի աշխատանքում սահմանափակումներ չեն մնացել»: Ընդ որում՝ Թեհրանը մտադիր է, ինչպես նախկինում, ԱԷՄԳ-ի հետ համագործակցությունը շարունակել, եւ պատրաստ է վերադառնալ պարտավորությունների կատարմանը, եթե պատժամիջոցները հանվեն եւ ապահովվեն Թեհրանի շահերը, որոնք նախատեսված են միջուկային գործարքով:

2015 թվականի հուլիսին «վեցնյակը» (Մեծ Բրիտանիա, Գերմանիա, Չինաստան, Ռուսաստան, ԱՄՆ եւ Ֆրանսիա) եւ Իրանը հայտարարեցին Գործողությունների համատեղ համապարփակ ծրագրի հասնելու մասին: Համաձայնագիրը ենթադրում էր պատժամիջոցների չեղարկում՝ Իրանի միջուկային ծրագրի սահմանափակման փոխարեն: Գործարքը նախնական տեսքով գոյատեւեց 3 տարի: 2018-ի մայիսին ԱՄՆ-ը հայտարարեց համաձայնագրից միակողմանի դուրս գալու եւ Իրանի դեմ խիստ պատժամիջոցների վերականգնման մասին: Իրանը հայտարարեց համաձայնագրի շրջանակում իր պարտավորությունների փուլային կրճատման մասին: