Զարիֆը հայտարարել է «Արեւմտյան Ասիայում ԱՄՆ-ի չարամիտ ներկայության» վերջի սկզբի մասին

Իրանի ԱԳՆ ղեկավար Մոհամմադ Ջավադ Զարիֆը հայտարարել է «Արեւմտյան Ասիայում ԱՄՆ-ի չարամիտ ներկայության» վերջի սկզբի մասին, հաղորդում է Mehr-ը:

«Դուք երբեւէ ձեր կյանքում տեսե՞լ եք նման մեծ թվով մարդկանց»,- գրել է նա՝ մեկնաբանելով գեներալ Ղասեմ Սոլեյմանիի հուղարկավորությունը եւ իր գրառման մեջ նշելով ԱՄՆ նախագահ Դոնալդ Թրամփին:

«Դուք դեռեւս ցանկանո՞ւմ եք լսել այդ ծաղրածուներին, որոնք մեր տարածաշրջանի հարցով խորհուրդներ են ձեզ տալիս: Դուք դեռ մտածո՞ւմ եք, որ կարող եք կոտրել այս հզոր երկրի եւ ազգի կամքը: Արեւմտյան Ասիայում ԱՄՆ-ի չարամիտ ներկայության վերջը սկսվել է»,- նշել է նա:

Հիշեցնենք, որ հունվարի 3-ի գիշերը ԱՄՆ-ը Բաղդադի օդանավակայանի շրջանում գործողություններ է անցկացրել, որոնց հետեւանքով սպանվել են Իսլամական հեղափոխության պահապանների կորպուսի (ԻՀՊԿ) «Կուդս» հատուկ ստորաբաժանման ղեկավար, գեներալ Ղասեմ Սոլեյմանին եւ Իրաքում շիական աշխարհազորայինների հրամանատարի տեղակալ Աբու Մահդի ալ-Մուխանդիսը, որոնց Վաշինգտոնում համարում են 2019 թվականի դեկտեմբերի 31-ին Բաղդադում ԱՄՆ դեսպանատան վրա հարձակման կազմակերպիչներ:

Իրանի հոգեւոր առաջնորդ այաթոլլահ Ալի Խամենեին եռօրյա սուգ է հայտարարել եւ ասել է, որ դաժան վրեժ է սպասվում նրանց, ում ձեռքերի վրա է Սոլեյմանիի եւ մյուս տառապյալների արյունը:

ԱՄՆ նախագահ Դոնալդ Թրամփը խոստացել է Իրանում 52 թիրախների ուղղությամբ «արագ եւ ուժեղ հարված հասցնել», եթե հարձակման ենթարկվեն ամերիկացիները:

Կարդացե՜ք նաև

Իրանցի գեներալ Ղասեմ Սուլեյմանիի սպանության հետեւանքները Հայաստանի եւ տարածաշրջանի համար