«ԱՄՆ-ն պատրաստ է Իրանի դեմ լրացուցիչ գործողությունների». Պենտագոնի ղեկավար

Պենտագոնի ղեկավար Մարկ Էսպերը, մեկնաբանելով Իրաքի և Սիրիայի տարածքում «Հըզբոլլահ» շարժման օբյեկտներին հասցված հարվածները, նշել է, որ ԱՄՆ-ն հարկ եղած դեպքում պատրաստ է Իրանի դեմ լրացուցիչ գործողությունների: Այս մասին տեղեկացնում է РИА Новости-ն:

Ավելի վաղ Պենտագոնում հայտարարել էին, որ ԱՄՆ-ն Իրաքում և Սիրիայում հարվածներ է հասցրել «Քաթաիբ Հըզբոլլահ» շարժման 5 օբյեկտներին՝ ի պատասխան «Իրաքի բազաների ուղղությամբ կրկնվող հարձակումների»: ԱՄՆ ռազմական գերատեսչությունում բացատրել են, որ իրենց գործողություններով պատասխանել են Քիրքուքի մոտակայքում գտնվող իրաքյան բազայի ուղղությամբ շարժման հարձակումներին, ինչի հետևանքով ԱՄՆ քաղաքացի է մահացել և վիրավորվել է ամերիկացի 4 զինվորական: Պենտագոնում նշել են, որ այդ հարվածներն ուղղված են նրան, որպեսզի նվազեցնեն շարժման կողմից հետագայում կոալիցիոն ուժերի նկատմամբ կատարվելիք հարձակումների հավանականությունը: ԱՄՆ-ն Իրանին մեղադրում է «Հըզբոլլահ» շարժմանը հովանավորելու համար:

«Հարվածները հաջող էին: Ես կուզեի ավելացնել, որ այսօր նախագահի հետ մեր զրույցի ընթացքում մենք քննարկել ենք նաև այլ հասանելի տարբերակներ: Եվ ես նաև կուզեի նշել, որ հարկ եղած դեպքում մենք լրացուցիչ գործողություններ կնախաձեռնենք ինքնապաշտպանության նպատակով և ռազմական խմբավորումների կամ Իրանի կողմից վատ գործողությունները վերացնելու համար»,- հայտարարել է Էսպերը:

ԱՄՆ պաշտպանության նախարարը պատմել է, որ հարվածները հասցնելու համար օգտագործվել են F-15 Strike eagle կործանիչ ռմբակոծիչներ: Օբյեկտներից երեքը գտնվում էին Իրաքի արևմուտքում, իսկ երկուսը՝ Սիրիայի արևելքում:

Պենտագոնի ղեկավարը, ԱՄՆ պետքարտուղար Մայք Պոմպեոն, ինչպես նաև ԱՄՆ զինված ուժերի շտաբների պետերի միացյալ կոմիտեի նախագահ Մարկ Միլին մեկնել էին Ֆլորիդա, որպեսզի տեղեկացնեն նախագահ Դոնալդ Թրամփին «Քաթաիբ Հըզբոլլահ» շարժման օբյեկտների ուղղությամբ հասցված հարվածների մասին: