«Հայաստանին զենք մատակարարելու մրցույթի շուրջ ստեղծված իրավիճակում առաջընթաց կա». ORSIS

Ռուսական ORSIS զենք արտադրող ընկերությունում առաջընթաց են տեսնում Հայաստանին ռազմական տեխնիկայի մատակարարման հարցով խափանված մրցույթի շուրջ ստեղծված իրավիճակում: Այս մասին РИА Новости-ին ասել է ընկերության պաշտոնական ներկայացուցիչը:

Ընկերության ներկայացուցչի խոսքով՝ խափանված մրցույթի հետ կապված իրավիճակում տարեվերջին առաջընթաց է նկատվում:

«Դատարանի որոշմամբ ORSIS-ին հանել են «սև ցուցակից»: Սա դրական միտում է, քանզի հնարավորություն է տալիս շարունակել մեր համագործակցությունը Հայաստանի հետ ու ժամանակակից և որակյալ զենք մատակարարել հանրապետությանը, որը մեր վաղեմի գործընկերն է»,-նշել է ընկերության ներկայացուցիչը:

Նրա խոսքով՝ հայկական լրատվամիջոցներում հայտնվել են տեղեկություններ, որ Հայաստանի պաշտպանության նախարարությունից բարձրաստիճան պաշտոնյաներ են հեռացվել՝ ORSIS-ի շուրջ ստեղծված իրավիճակի պատճառով:

«Ընկերությունում կարծում են, որ մրցույթի խափանման հիմնական մեղավորները դեռևս պատժված չեն: Մինչև այժմ պարզ չեն նախարարության կողմից հանդիպման հրավերն անպատասխան թողնելու պատճառները: Ընկերությանը տեղեկություններ են հասնում Պաշտպանության նախարարության տարբեր պաշտոնյաների կողմից ORSIS-ի նվիրած զինատեսակների յուրացման մասին»,-հավելել է ընկերության ներկայացուցիչը:

Հիշեցնենք, որ ORSIS ընկերությունը հայտնվել էր «սև ցուցակում»՝ ՀՀ ՊՆ-ի կողմից մի քանի միլիոն դոլարի ռազմական տեխնիկայի գնման մրցույթի տապալման համար: Դրանից հետո ՌԴ առևտրաարդյունաբերության նախարարությունը նամակ էր ուղարկել ՀՀ պաշտպանության նախարար Դավիթ Տոնոյանին, որում ընկերության հետ կապված որոշումը որակել էր «չմոտիվացված»: ՀՀ-ում քրեական գործ էր հարուցվել մրցույթի տապալման փաստով՝ «ծառայության նկատմամբ անփույթ վերաբերմունքի» հատկանիշներով, սակայն այնուհետև ORSIS-ին հանել էին Հայաստանին զենք մատակարարող ընկերությունների «սև ցուցակից»: