Հայաստանում սպառնում են ձերբակալել անգամ Ձմեռ պապիկներին

Երեւանի փոխքաղաքապետը սպառնում է ձերբակալել Հանրապետության հրապարակի այն Ձմեռ պապիկներին, որոնք կհամարձակվեն գումար վերցնել բնակիչներից: Այս մասին նա հայտարարում է հենց ավագանու նիստի ժամանակ:

Մի կողմ թողնենք այն հարցը, թե ինչ շահ ունեն նրանք, ովքեր Ձմեռ պապի կամ Ձյունանուշի շորեր են հագնելու, որախացնելու երեխաներին, լուսանկարվելու նրանց հետ, բայց գումար չեն աշխատելու: Հիմա անդրադառնանք ավելի կարեւոր հարցի:

Ստացվում է, որ այսօրվա իշխանությունները շատ թույլ են, ավելի թույլ, քան կարող են մտածել ոմանք, քանի որ միայն թույլ ղեկավարներն են սպառնում ձերբակալություններով, կալանավորումներով: Միայն թույլ ղեկավարների օրոք են համատարած ձերբակալություններ իրականացվում:

Հիմա, երբ արդեն սպառնում են ձերբակալել նույնիսկ Ձմեռ պապերին եւ Ձյունանուշներին, ամբողջովին կարող ենք հասկանալ գործող իշխանությունների հոգեբանությունը, վախերն ու հույզերը:

Նրանք իրենց պաշտպանված են զգում բացառապես ուժային կառույցների թիկունքին: Ժողովրդին սպառնում են ԱԱԾ-ով, ոստիկանությամբ, դատախազությամբ: Իհարկե, այսպես երկիր չեն կառուցում, այսպես անհնար է առաջ շարժվել, եւ վերջապես, այս հոգեբանությամբ անհնար է երկարաժամկետ կառավարումը, երբ ռեսուրսներն էլ աղքատիկ են:

Մնում է ժպտալ, թեթեւացած շունչ քաշել, որ Երեւանի փոխքաղաքապետը ոստիկաններին առաջարկել է ոչ թե տեղում գնդակահարել փող վերցնող Ձմեռ պապերին, այլ ընդամենը ձերբակալել: 

Աննա Բաղդասարյան

Top-News.am