ԱՄՆ-ը շուտով կարող է պահանջել չշնչել. Զախարովան՝ «Հյուսիսային հոսք-2»-ի դեմ պատժամիջոցների մասին

ԱՄՆ-ը շուտով կարող է պահանջել չշնչել: Այս մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան՝ մեկնաբանելով «Հյուսիսային հոսք-2» եւ «Թուրքական հոսք» գազամուղերի դեմ պատժամիջոցները, հաղորդում է ՏԱՍՍ-ը:

«22 տրիլիոն դոլարի պետական պարտք ունեցող պետությունը վարկունակ երկրներին արգելում է զարգացնել իրենց տնտեսությունը: Պարտքով կյանքի ամերիկյան գաղափարախոսությունը չի գոյատեւում համաշխարհային մրցակցությունում, ինչը մշտապես հաստատում է ԱՄՆ ֆիննախը՝ «տնտեսական կալանքի օրդերներ» տալով»,- գրել է նա Facebook-ի իր էջում:

Ավելի վաղ ԱՄՆ Կոնգրեսի Սենատը հավանություն է տվել 2020-ի ֆինանսական տարվա համար պաշտպանական բյուջեին (National Defense Authorization Act, NDAA), որը վարչակազմին պարտավորեցնում է պատժամիջոցներ սահմանել ռուսական «Հյուսիսային հոսք-2» եւ «Թուրքական հոսք» գազամուղերին: Դեկտեմբերի 11-ին այդ փաստաթղթի օգտին քվեարկել է Ներկայացուցիչների պալատը, որից հետո այն ստորագրել է նախագահ Դոնալդ Թրամփը, եւ օրինագիծն ուժի մեջ է մտել: