Գյումրիում Մարիամ Փաշինյանին սպասարկում էր 3 մեքենա․ Գագիկ Համբարյան

Tert.am-ը գրում է․ «Բավականին ուշի ուշով հետևում եմ պարոն վարչապետի թե՛ հայտարարություններին, թե՛ գրառումներին, կարող եմ նշել, որ պարոն Փաշինյանը, շատ դեպքերում կա՛մ միտումնավոր է կեղծ տվյալներ հրապարակում, կամ նրան գերատեսչությունները, այս պարագայում՝ ՊՊԾ-ն կեղծ տեղեկություններ են տալիս: Այս մասին Tert.am-ի հետ զրույցում ասաց քաղաքագետ Գագիկ Համբարյանը՝ անդրադառնալով թեմային առ այն, որ վարչապետի դստեր՝ Մարիամ Փաշինյանի մեքենայի գնումն իրականացվել է ոչ թե 2018 թվականի ապրիլին՝ ինչպես ասում է վարչապետը, այլ նոյեմբեր-դեկտեմբեր ամիսներին:

Նրա խոսքով՝ խնդիրն այստեղ ոչ թե նրանում է, թե երբ է գնվել մեքենան, այլ այն, որ այդ մեքենան հիմա օգտագործվում է Մարիամ Փաշինյանի կողմից: «Խնդիրն այն է, որ պարոն վարչապետը, ժամանակին Ազգային ժողովի ամբիոնն օգտագործելով, ամոթանք էր տալիս նախորդ իշխանություններին և օրինակ բերում Դանիան, որտեղ ընդամենը 23 ծառայողական մեքենա կա. հիմա երևի միայն իր ընտանիքին մոտավորապես 40 մեքենա է սպասարկում: Ես նշեմ, որ մեկ, մեկուկես ամիս առաջ եմ տեսել Մարիամ Փաշինյանին Գյումրիում իր քրոջ հետ, նրանց սպասարկում էր երեք մեքենա: Բացի նրանից, որ իրենք ունեին անձնական թիկնապահներ, Գյումրրից էլ երկու ոստիկաններ էին շրջում նրանց հետ: Այդտեղ գտնվող ժողովուրդն էլ, բոլորն էլ տեսան, թե Մարիամ Փաշինյանն ինչ ճոխ ապրելաոճ է ընդօրինակել»,- ասաց նա:

Քաղաքագետը շեշտեց, որ, ընդհանրապես, շատ լավ կլինի, որ վարչապետը մեկ-մեկ վերհիշի իր նախորդ ելույթների բովանդակությունը և հաշվի առնի այն հանգամանքը, որ Հայաստանում բավական մեծ թիվ են կազմում նաև բանիմաց մարդիկ, որոնք իր վարչապետության օրոք կատարած քայլերը համեմատում են իր ընդդիմադիր գործիչ եղած ժամանակվա հայտարարությունների և քայլերի հետ և կարող են մեկ փաստ արձանագրել՝ վարչապետի խոսքերը բացարձակ չեն համապատասխանում կատարած գործերի հետ:

Դիտարկմանը՝ վարչապետն ասում է՝ դա օրենքի պահանջ է և իրենք օրենքով չեն կարող հրաժարվել պետական պահպանությունից և որ իր ընտանիքի անդամները երազում են հին ապրելակերպին վերադառնալու մասին, երեկ էլ տեսանյութ հրապարակեց վարչապետը, որտեղ Մարիամ Փաշինյանը խոսում է, որ ցանկանում է մայթին կանգնել, նա պատասխանեց. «Ես շատ զարմացած եմ, որ իրեն ժողովրդի վարչապետ հռչակած Նիկոլ Փաշինյանը սարսափում է ժողովրդից: Նրա լայվերը, հանդիպումները, որ մարզեր է գնում և ցույց տալիս, որ մարդիկ շատ հասարակ իրեն մոտենում, ողջունում են, դա լրիվ կեղծիք է»:

Նա վստահեցրեց՝ մի քանի անգամ տեսել է պարոն Փաշինյանին Գյումրիում և արձանագրել, որ նրա թիկնազորում մոտ 3 տասնյակ մարդ կա. «Փողոցը գրեթե ամբողջությամբ փակվում է, երբ ինքը երթևեկում է և շատ քչերը նրան կարող են մոտենալ: Ինչ վերաբերում է իր ընտանիքի երազանքներին, այդ երազանքները նրանք կարող են շատ հեշտ ի կատար ածել: Պարոն Փաշինյանն իրեն հռչակում է ժողովրդի վարչապետ, ժողովրդի վարչապետն իրեն թող պահի հենց այդ կերպ: Հիշեցնեմ՝ Հայաստանը գերտերություն չէ և պարոն Փաշինյանին էլ շատ մեծ վտանգներ չեն սպառնում»,- ասաց նա:

Դիտարկմանը՝ օրենքով սահմանված է, որ վարչապետը չի կարող հրաժարվել պետական պահպանությունից, նա ասաց, որ այո, չի կարող հրաժարվել, բայց վարչապետը կարող է հրաժարվել այդ «ճոխ» պահպանությունից, դա աչք է զարնում: «Ես երբևիցե չեմ տեսել ո՛չ Լևոն Տեր-Պետրոսյանին, ո՛չ Ռոբերտ Քոչարյանին, ո՛չ էլ Սերժ Սարգսյանին այդ քանակությամբ թիկնազորով երթևեկելիս: Բոլոր նախագահներին էլ տեսել եմ թե՛ Գյումրիում, թե՛ Երևանում, բայց նրանք պարոն Փաշինյանի նման «պաշտպանված չէին» , ումի՞ց է պաշտպանվում ժողովրդի վարչապետը, ես չգիտեմ»,- ասաց նա:

Համբարյանը հավելեց՝ ինչ վերաբերում է նրանց երազանքներին, ապա նրանց երեխաները կարող են շատ նորմալ ի կատար ածել, ո՞վ է խանգարում նրանց առանց թիկնազորի երթևեկել:

Դիտարկմանը՝ վարչապետը հղում է անում օրենքին, որ օրենքն է խանգարում, նա ասաց. «Նրանք կարող են ընդամենը մեկ թիկնապահով ման գալ, եթե այդ օրենքն այդքան շատ խնդիրներ է ստեղծում, թող մեկ թիկնապահով ման գան: Բայց էլի եմ կրկնում, պարոն Փաշինյանի դուստրը երեք մեքենայով էր ման գալիս Գյումրիում, չհաշված թիկնազորը, նաև երկու տեղացի ոստիկան էին նրանց հետ շրջում: Օրե՞նքն է նախատեսում ճոխ թիկնազորով ման գալը»:

Նա շեշտեց, բացի այս չի կարելի մոռանալ մեկ հանգամանք. «Տիկին Աննա Հակոբյանը սրտաճմլիկ գրառումներ է անում, ուզում է գնա իրենց հին տունը, ո՞վ է իրենց խանգարում, որ գնան: Մենք չունեի՞նք վարչապետ, որ մինչև իր կյանքի վերջին օրերը ապրում էր իր տանը: Անդրանիկ Մարգարյանը, որ Ավանում էր ապրումն բարձրահարկ սովորական ինն հարկանի պանելային շենքում էր ապրում, վարչապետ չէ՞ր: Եթե Աննա Հակոբյանին շատ ճնշում է կառավարական առանձնատունը, թող տեղափոխվեն իրենց տուն, և ինչպես Անդրանիկ Մարգարյանն էր գնում-գալիս աշխատանքի, այդպես էլ թող իրենք անեն: Ի՞նչ է եղել որ: Արա Բաբլոյանն էլ էր, չէ՞, իր տանը ապրել և այլ պաշտոնյաներ, որոնք ևս կարող էին ապրել կառավարական ամառանոցներում, բայց հրաժարվում էին և ապրում իրենք իրենց տանը,: Հա, թող չհրաժարվեն թիկնազորից, բայց էդ թիկնազորի քանակն էլ նշանակություն ունի»:

Գագիկ Համբարյանը հայտարարեց, որ Նիկոլ Փաշինյանն էլ թող գնա ՀՀ նախկին վարչապետ Անդրանիկ Մարգարյանի նման բակում նարդի խաղա հարևանների հետ: «Այդպես ավելի մեծ PR կանի, քան էն շինծու և կեղծ PR ակցիաները, որոնք անում է. օրինակ՝ մեկ անգամ գնում է հեծանիվով գործի, և ամենածիծաղելին այն է, որ հեծանիվով գործի է գնում շաբաթ օրը»,- ասաց նա:

Ինչ վերաբերում է հայտնի տեսանյութում վարչապետի արած հայտարարությանը, որ ասում է՝ փախել են ՊՊԾ-ից, նա ասաց. «Պարոն Փաշինյանը շատ լավ հասկացավ, թե ինչ աղմուկ բարձրացավ իր դստեր ցոպ և շվայտ վարքագծի արդյունքում, և լայվով փորձել է մեղմել դստեր՝ թիկնազորով կամ «պադավատով» երթևեկելու արդյունքում հասարակության մոտ առաջացած բացասական նստվածքը. հիմա փորձում է հումորներ անել, կեղծ օրակարգեր ստեղծել»:

Քաղաքագետը նշեց՝ եթե վարչապետի թիկնազորը թույլ է տալիս, որպեսզի ադրբեջանցին Միլանում մտնի հայկական եկեղեցի և «միամիտ տեղը» հարցեր տա վարչապետին, եթե թույլ է տալիս, որպեսզի Հաթերքի ճանապարհին նրա մեքենայի հետևից ինչ-որ մարդ ջուր լցնի ու թիկնազորը էլի հանգիստ վերաբերի դրան, իսկ հիմա էլ եթե կարողանում է իր թիկնազորից փախչել, ուրեմն այդ թիկնազորը բացարձակ ոչ մի բանի պետք չէ:

«Առաջարկում եմ պարոն Փաշինյանին այս օրվանից բոլորին աշխատանքից ազատել և զբաղվել նոր թիկնազորի փնտրտուքով: Որովհետև եթե ինքն այս ձևով փորձում է մեղմել հասարակության զայրույթը և բառացիորեն խայտառակում է իր թիկնազորին, ուրեմն դա արդեն իր խնդիրն է, իսկ եթե այս ամենը իրականությունն է, և նա իրոք կարող է իր թիկնազորից փախչել, ուրեմն թիկնազորը լավ թիկնազոր չէ, եթե Փաշինյանն ու իր ընտանիքի անդամները կարողանում են փախչել թիկնազորից»,- եզրափակեց նա: