Դատարանը մերժեց Քոչարյանի խափանման միջոցը վիճարկող միջնորդությունը

Վերաքննիչ քրեական դատարանն այսօր՝ դեկտեմբերի 20–ին, մերժեց ՀՀ երկրորդ նախագահ Ռոբերտ Քոչարյանի նկատմամբ որպես խափանման միջոց գրավի կիրառումը անթույլատրելի ճանաչելու՝ առաջին ատյանի դատարանի որոշումը վիճարկող՝ պաշտպանների միջնորդությունը։

Նշենք, որ նոյեմբերի 7-ին Երեւանի ընդհանուր իրավասության դատարանը՝ Աննա Դանիբեկյանի նախագահությամբ, մերժել էր Ռոբերտ Քոչարյանի պաշտպանների միջնորդությունը՝ խափանման միջոց գրավի կիրառումը թույլատրելի ճանաչելու վերաբերյալ։

Դատարանն այսօր՝ խորհրդակացական սենյակից վերադառնալով, հայտարարեց, որ անփոփոխ է թողնում նոյեմբերի 7–ի որոշումը։

Հիշեցնենք, որ դեկտեմբերի 16-ին Քոչարյանի պաշտպան Արամ Վարդեւանյանն ինքնաբացարկի միջնորդություն էր ներկայացրել Վերաքննիչ քրեական դատարանի դատավոր Լուսինե Աբգարյանին։ Ինքնաբացարկի հիմքը, ըստ պաշտպանի, դատավորի եղբայր Դավիթ Աբգարյանին վերաբերող մամուլում տարածված տեղեկությունները։ Մասնավորապես, Դավիթ Աբգարյանն իր ֆեյսբուքյան էջում հավանել եւ կիսվել էր երգիչ Սերժ Թանկյանի գրառմամբ, որտեղ վերջինս գոհունակություն էր հայտնել Ռոբերտ Քոչարյանին կալանավորելու վերաբերյալ։ Դատավորը նախորդ դատական նիստին ինքնաբացարկ չհայտնեց։

Ավելի վաղ, նույն գործով Վերաքննիչ դատարանի դատավոր Մխիթար Պապոյանը, բավարարելով դատախազների միջնորդությունը, ինքնաբարկ էր հայտնել։ Դատախազ Գեւորգ Բաղդասարյանը նշել էր, որ դատավոր Պապոյանը չի կարող անաչառ ու անկողմնակալ վարքագիծ դրսեւորել, քանի որ առկա են դրա վրա ազդող արտաքին գործոնները, որոնք կարող են անվստահություն առաջացնել Պապոյանի կողմից կայացվող ակտի նկատմամբ։

Հիշեցնենք, որ Ռոբերտ Քոչարյանը 2008 թվականի «Մարտի 1-ի» քրեական գործով մեղադրվում է սահմանադրական կարգը տապալելու համար: