Ապագայում արեւային կայանները կբավարարեն Հայաստանի էլեկտրաէներգիայի պահանջի 30 տոկոսը. փոխնախարար

Միջհամակարգային կապերի զարգացման մեջ անհրաժեշտ ներդրումների առկայությամբ արեւային կայանները կարող են բավարարել Հայաստանի էլեկտրաէներգիայի պահանջի 30 տոկոսը: Այս մասին դեկտեմբերի 20-ին ԵՄ-ՄԱԿ ԶԾ «ԵՄ-ն կլիմայի համար» տարածաշրջանային ծրագրի շրջանակում քննարկման ժամանակ ասաց տարածքային կառավարման եւ ենթակառուցվածքների փոխնախարար Հակոբ Վարդանյանը:

Փոխնախարարն ընդգծեց, որ առանց հուսալի միջհամակարգային կապերի ներդրման՝ Հայաստանում անհնար է արեւային էներգետիկայի կայուն զարգացումը: Նրա խոսքով՝ սա կապված է օրվա ցերեկային եւ գիշերային ժամերին բնակչության էլեկտրաէներգիայի սպառման մակարդակների զգալի տարբերության հետ, ուստի անհրաժեշտ է ապահովել գիշերը չօգտագործվող էլեկտրաէներգիայի արտահանման հնարավորությունը: «Հայաստանում ծրագրվում է մինչեւ 2024 թվականը կառուցել մինչեւ 400 ՄՎտ հզորությամբ արեւային էլեկտրակայաններ, իսկ 2030 թվականին իշխանությունները մտադիր են այս ցուցանիշները հասցնել մինչեւ 1000 ՄՎտ-ի»,- հավելեց նա:

Վարդանյանը շեշտեց, որ շրջակա միջավայր վնասակար նյութերի արտանետումների նվազեցման տեսակետից կարեւոր է նաեւ բազմաբնակարան շենքերում 14 մլն դոլար գումարի էներգախնայողության բարձրացման ծրագրերի իրականացումը, որը ֆինանսավորում է ԵՄ-ն: