Քեյթ Միդլթոնը հայտնել է, որ արքայազն Ուիլյամը խոհարարությամբ է փորձել գրավել իր սիրտը (լուսանկարներ)

Քեմբրիջի դքսուհի Քեյթ Միդլթոնը Սուրբ Ծննդի տոնին նվիրված հատուկ` Berry Royal Christmas թողարկման ժամանակ խոստովանել է, որ Մեծ Բրիտանիայի արքայազն Ուիլյամն իրենց ընկերության սկզբնական շրջանում, երբ դեռ սովորում էին համալսարանում, իր սիրտը փորձում էր խոհարարական հմտությունների միջոցով գրավել, գրում է Insider-ը:

«Ուսանողական տարիներին նա տարբեր տեսակի կերակուրներ էր պատրաստում»,- խոհանոցային գրքերի հեղինակ և հաղորդավարուհի Մերի Բերիի հետ զրույցի ընթացքում խոստովանել է Քեմբրիջի դքսուհին և հավելել. «Կարծում եմ՝ նա այդպիսով ինձ վրա փորձում էր տպավորություն գործել, Մերի»:

Քեյթ Միդլթոնը հայտնել է նաև, որ արքայազնը հիմա էլ ժամանակ առ ժամանակ պատրաստում է:

«Նա հիանալի նախաճաշ է պատրաստում»,- ասել է նա:

Մինչ թագավորական ընտանիքի մյուս անդամները՝ արքայազն Չարլզի և թագուհու գլխավորությամբ, ունեն իրենց անձնական խոհարարները, երևում է՝ Քեմբրիջի դուքսը և դքսուհին արքայազն Ուիլյամի խոհարարական հմտությունների շնորհիվ անձնական խոհարարի կարիք չունեն, գրում է աղբյուրը:

Սուրբ Ծննդի տոնին նվիրված հատուկ` Berry Royal Christmas թողարկման ժամանակ, որը BBC One հեռուստաալիքով եթեր է հեռարձակվել երկուշաբթի, թագավորական զույգը հաղորդավարուհի Մերիի հետ կերակուրներ է պատրաստում և քննարկում բարեգործության վերաբերյալ մի շարք հարցեր:

Միևնույն եթերի ժամանակ արքայազն Ուիլյամը պատմել էր նաև, որ իր երեխաները սկսել են հետաքրքրություն ցուցաբերել անօթևանության խնդրի նկատմամբ:

«Դպրոցի ճանապարհին, երբ որևէ մեկին տեսնում ենք փողոցում քնած, ես նրանց հետ զրուցում եմ այդ մասին»,- հայտնել էր Քեմբրիջի դուքսը և հավելել, որ իր երեխաները հետաքրքրություն են ցուցաբերում և հարցնում. «Ինչո՞ւ նրանք չեն կարող տուն գնալ»: