ՀԴԲ-ն լուսանկարներ մշակելու ռուսական հավելվածը «պոտենցիալ սպառնալիք» է համարում

Ռուսական ցանկացած հավելված, ներառյալ լուսանկարներ մշակելու հանրահայտ ռուսական FaceApp հավելվածը «պոտենցիալ հակահետախուզական սպառնալիք» է ներկայացնում ԱՄՆ-ի համար, կարծում են Հետաքննությունների դաշնային բյուրոյում։

Այսպես է հաստատությունը պատասխանել Նյու Յորք նահանգից սենատոր Չաք Շումերի դիմումին, որով նա խնդրել էր ստուգել ռուսական FaceApp հավելվածը։ ՀԴԲ-ի պատասխանը նա հրապարակել է Twitter-ում, հայտնում է BBC-ն։

ՀԴԲ-ն այսպիսի եզրահանգում է կատարել՝ ելնելով հավելվածի կողմից հավաքվող տվյալների տեսակից, գաղտնիության նրա քաղաքականությունից եւ օգտագործման պայմաններից, ինչպես նաեւ իրավական մեխանիզմներից, որոնք հասանելի են Ռուսաստանի կառավարությանը, ասվում է պատասխան փաստաթղթում։

Նամակում նաեւ հաստատվում է, որ ռուսական հատուկ ծառայությունները, մասնավորապես՝ ԱԴԾ-ն, «հզոր հնարավորություններ» ունեն, որոնք թույլ են տալիս նրանց հասանելիություն ստանալ ռուսական ցանցերում բոլոր կոմունիկացիաներին եւ սերվերներին՝ առանց դիմելու ինտերնետ-պրովայդերներին։

Եթե ԱԴԾ-ն հայտնաբերի, որ ընտրված պաշտոնյաները, թեկնածուները, քաղաքական կազմակերպությունները կամ կուսակցությունները FaceApp-ի միջոցով արտասահմանյան ազդեցության տակ են, ապա անհրաժեշտ միջոցներ կձեռնարկի։