«Մելանյան և ամուսինը քնում են տարբեր հարկերում գտնվող սենյակներում». նոր գիրքը բացահայտումներ է անում ԱՄՆ նախագահական ընտանիքի վերաբերյալ

Դեկտեմբերի 3-ին ԱՄՆ-ում հրատարակվել է երկրի առաջին տիկին Մելանյա Թրամփի վերաբերյալ «Ազատ Մելանիա» գիրքը, որում CNN-ի թղթակից Քեյթ Բենեթը ներկայացնում է նախկին մոդելի կենսագրությունը:

Ինչպես գրում է Daily Mail-ը, ըստ հեղինակի՝ տիկին Թրամփն ամուսնու՝ նախագահ Դոնալդ Թրամփի հետ միևնույն սենյակում չի քնում: Նա ունի իր առանձին «գլամուրային» սենյակը, որը գտնվում է մյուս հարկում: Թրամփի սենյակը երկրորդ հարկում է, իսկ կնոջինը՝ երրորդում: Ի դեպ, նախկինում այդ սենյակը զբաղեցնում էր 44-րդ նախագահ Բարաք Օբամայի զոքանչը:

288 էջանոց գրքում նաև նշվում է, որ տիկին Թրամփը բավական լարված հարաբերությունների մեջ է ամուսնու՝ առաջին ամուսնությունից ծնված դստեր՝ Իվանկա Թրամփի հետ:

Բացի այդ, հեղինակն անդրադարձ է անում առաջին տիկնոջ՝ 2018թ. մայիսին տարած վիրահատությանը՝ բացահայտելով, որ նրա վիճակը բավական լուրջ է եղել և որ տիկին Թրամփը կարող էր կորցնել երիկամներից մեկը: Հայտնի է, որ երիկամի վրա գոյացություն է եղել. բժիշկներն այն հեռացրել են բավական բարդ վիրահատության արդյունքում:

Նշվում է, որ Մելանյա Թրամփն ԱՄՆ պատմության «ամենափակ» առաջին տիկիններից է: Նա շատ հազվադեպ է հարցազրույցներ տալիս ու գրեթե չի պատմում անձնականից: